حاڵه‌ته‌كانی ئاوڵه‌ی مه‌یمون له‌فه‌ره‌نسا به‌رزده‌بێته‌وه‌

به‌رپرسانی ته‌ندروستی فه‌ڕه‌نسا دوێنێ هه‌ینی رایانگه‌یاند، 51 حاڵه‌تی توشبوون به‌ئاوڵه‌ی مه‌یمون دۆزراوه‌ته‌وه‌ ئه‌وه‌ش له‌كاتێكدایه‌ كه‌ ژماره‌ی ئه‌وانه‌ی به‌دڵنیایی تووشی نه‌خۆشییه‌كه‌ بوون له‌سه‌رانسه‌ری جیهاندا رووی له‌به‌رزبوونه‌وه‌ كردووه‌، یه‌كه‌م حاڵه‌تیش له‌مانگی مایسی رابردوو راگه‌یه‌نراو تا ئێستاش كۆی ژماره‌ی حاڵه‌ته‌ دڵنیاكان گه‌یشتۆته‌ 33 حاڵه‌ت.

هه‌ر دوێنێ هه‌ینی سه‌نته‌ری به‌ره‌نگاربوونه‌وه‌ی نه‌خۆشییه‌كان و خۆپارێزی له‌ئه‌مریكا بڵاویكردبوه‌وه‌ به‌گوێره‌ی ئه‌و زانیارییانه‌ی له‌به‌رده‌ستییانه‌ له‌سه‌ر ئاستی جیهان زیاتر له‌ 700 حاڵه‌تی توشبوون به‌ڤایرۆسی ئاوڵه‌ی مه‌یمون تۆمار كراوه‌ كه‌له‌نێویاندا 21 حاڵه‌تیان له‌ئه‌مریكایه‌.

هه‌ر له‌و باره‌یه‌وه‌ ده‌سته‌ی ته‌ندروستی گشتی له‌فه‌ڕه‌نسا رایگه‌یاندبوو سه‌رجه‌م ئه‌و حاڵه‌تانه‌ی روویانداوه‌ له‌نێو پیاواندا بوه‌و ته‌مه‌نیان له‌نێوان 22 و 63 ساڵاندایه‌و یه‌كێك له‌توشبووه‌كانیش كه‌ ره‌وانه‌ی نه‌خۆشخانه‌ كرابوو دوای وه‌رگرتنی چاره‌سه‌ر نه‌خۆشخانه‌ی به‌جێهێشتووه‌.

به‌گوێره‌ی ئه‌و توێژینه‌وانه‌ی رێكخراوی ته‌ندروستی جیهانیی له‌سه‌ر ڤایرۆسه‌كه‌ كردویه‌تی، ئاوڵه‌ی مه‌یمون نه‌خۆشییه‌كی ڤایرۆسیی ده‌گمه‌نه‌و له‌ناو ئاژه‌ڵدا سه‌رهه‌ڵده‌داو له‌وێشه‌وه‌ بۆ مرۆڤ ده‌گوزارێته‌وه‌، ئه‌و نیشانانه‌ی كه‌به‌هۆی ڤایرۆسه‌كه‌وه‌ له‌مرۆڤی توشبوودا ده‌رده‌كه‌وێت هه‌مان ئه‌و نیشانانه‌یه‌ كه‌ كه‌سانی توشبوو به‌ئاوڵه‌ی ئاسایی تووشی ده‌بێت به‌ڵام به‌پله‌یه‌كی كه‌متر.

به‌شێك له‌نه‌خۆشه‌كان پێشئه‌وه‌ی برین له‌سه‌ر پێسته‌كانیان بێت، هه‌ڵاوسان له‌گرێ لیمفاوییه‌كانیاندا دروست ده‌بێت و به‌و نیشانه‌یه‌ش ده‌توانرێت ئاوڵه‌ی مه‌یمون له‌نه‌خۆشییه‌ هاوشێوه‌كانی جیابكرێته‌وه‌، له‌ئێستاشدا هیچ چاره‌سه‌رێك یاخود ڤاكسینێك بۆ به‌ره‌نگاربوونه‌وه‌ له‌ڤایرۆسه‌كه‌ له‌به‌رده‌ستدا نییه‌، له‌گه‌ڵ ئه‌وه‌شدا ڤاكسینی دژ به‌ئاووڵه‌ هه‌یه‌ كه‌ له‌سه‌ر ئاستێكی باڵا سه‌لمێنراوه‌ كه‌ ده‌توانرێت خۆپارێزی له‌ئاوڵه‌ی مه‌یمونی پێبكرێت.

بۆ یه‌كه‌مین جاریش ئاوڵه‌ی مه‌یمون له‌كۆماری كۆنگۆی دیموكرات له‌ساڵی 1970 دۆزرایه‌وه‌و له‌و كاته‌شه‌وه‌ زۆربه‌ی حاڵه‌ته‌كانی توشبوون به‌ڤایرۆسه‌كه‌ له‌ناوچه‌ گوندنشینه‌كان له‌دارستانی ماتیره‌ له‌سه‌ر ده‌ریاچه‌ی رووباری كۆنگۆ و رۆژئاوای ئه‌فریقیا بڵاوده‌بێته‌وه‌.

هه‌فته‌ی رابردووش بریجیت بورغینیون وه‌زیری ته‌ندروستی فه‌ڕه‌نسا رایگه‌یاندبوو به‌رپرسانی ته‌ندروستی پێشبینی ناكه‌ن نه‌خۆشییه‌كه‌ بڵاوببێته‌وه‌و بڕێكی باشی ڤاكسینی عه‌مباركراویان له‌وڵاتدا هه‌یه‌.

فه‌ڕه‌نساش ئامۆژگاری داوه‌ته‌ پێگه‌یشتووان و كارمه‌ندانی ته‌ندروستی خۆیان بكوتن.

   PUKmedia  ئاژانسه‌كان