لەبارەی خوێندكارانی 12ی ئامادەیی داوایەك ئاڕاستەی دوو وەزارەت دەكرێت

سەرۆكی یەكێتی مامۆستایانی كوردستان پێشبینی دەكات ئەمساڵیش رێژەیەكی زۆری خوێندكارانی 12ی ئامادەیی بۆ زانكۆوپەیمانگاكان سەربكەون و نمرەی بەرز بەدەستبهێنن، داواش دەكات لە پێناو دووبارە نەبوونەوەی كێشەوگرفتەكانی نمرەو وەرگرتنی خوێندكاران پێویستە هەر لەئێستاوە هەماهەنگی لەنێوان وەزارەتی پەروەردە و خوێندنی باڵا بكرێت و ئامادەكاری بۆ ئەو قۆناغەبكەن.
عەبدولواحید محەمەد سەرۆكی یەكێتی مامۆستایانی كوردستان بە PUKmediaی راگەیاند: بۆ ئەوەی جارێكی تر گرفتی وەرگرتنی خوێندكارانی 12ی ئامادەیی لە زانكۆو پەیمانگاكانی كوردستان دووبارە نەبێتەوە، پێویستە هەر لە ئێستاوە دیراسەی ئەو بابەتە بكرێت و هەماهەنگی لەنێوان هەردوو وەزارەتی پەروەردەو خوێندنی باڵا هەبێت.
وتیشی: بەهۆی ئەوەی رێژەی خوێندكارانی 12ی ئامادەیی لەهەرێمی كوردستان زۆرە و چاوەڕاون دەكرێت ئەمساڵیش خوێندكاران نمرەی بەرز بەدەست بهێنن، بۆیە ئەگەر لەئێستاوە بەرنامەو پلانی زانستی دانەندرێت، دوور نیە هەمان گرفتی ساڵی رابردوو دووبارە بێتەوە، دواجار گردبونەوەو خۆپشاندانی ناڕەزایی دەستپێبكاتەوە.
سەرۆكی یەكێتی مامۆستایانی كوردستان پێشیوابوو: بۆ ئەوەی كێشەی خوێنكارانی ئامادەیی و زانكۆكان لەبنەڕەتەوە چارەسەر بكرێت، پێویستە لەهەرێمی كوردستان ئەنجومەنێك لە سەرۆكایەتی ئەنجومەنی وەزیران بەسەرۆكایەتی جێگری سەرۆكی حكومەت پێكبهێنرێت و هەردوو وەزیری پەروەردەو خوێندنی باڵاو كەسانی شارەزاو پسپۆڕ تێیدا ئەندام بن.
راشیگەیاند: وەك لەوڵاتەپێشكەوتووەكانیش پەڕەو دەكرێ، دەتوانرێ لەرێگای ئەنجومەنێكی لەو جۆرە  سیاسەت و پلانی ساڵانەی  پەروەردەو خوێندن دابڕێژرێت، ئەمەش وادەكات وەزارەتەكان و لایەنی پەیوەندار لەیەكتر نزیكبكاتەوە و هەماهەنگیەكان لەنێوان دامەزراوەكانی ئەو بوارە بەهێزتر بێت.
PUKmedia   تەها عەبدوڵڵا