وەزیری ڕۆشنبیری: كەسانی وەك بۆكان جاف پارێزەری كلتوور و زمانن

وەزیری ڕۆشنبیری و لاوانی حكومەتی هەرێمی كوردستان ڕایدەگەیەنێت: لەسەردەمی تەكنۆلۆژی و جەهانگیریدا لاوان و كەسانی وەك بۆكان جاف پارێزەری كلتوور و زمانی شیرینی كوردین.

ئەمڕۆ پێنجشەممە 19-5-2022 لە دیوانی وەزارەت، حەمەی حەمە سەعید پێشوازیكرد لە بۆكان حەسەن جاف ئەو گەنجەی كە كوردی سۆرانی بۆ بەشی وەرگێڕانی گووگڵ زیادكردووە.

وەزیری ڕۆشنبیری و لاوان پشتیوانی و پشتگیری تەواوی حكومەتی هەرێم و وەزارەتی ڕۆشنبیری بۆ بۆكان جاف دووپاتكردووە لەبەرمبەر ئەو كارە گەورەی ئەنجامیداوە و بە پاراستنی زمانی كوردی و ناساندنی بە جیهان وەسف كرد.

حەمەی حەمە سەعید ڕاشیگەیاند: ئەگەر لەڕابروودا شۆڕشەكانی كورد و پێشمەرگەكانی كوردستان پارێزەر و بەرگریكاری كلتوور و زمانی كوردی بوون، ئەوا ئەمڕۆ و لەسەردەمی تەكنۆلۆژیا و جەهانگیریدا بۆكانەكان و لاوانی كوردستان پارێزەری كلتووری و زمانی شیرینی كوردین.  
PUKmedia