سلێمانی.. خۆڵبارین 70 هاووڵاتی ره‌وانه‌ی نه‌خۆشخانه‌ ده‌كات

به‌هۆی كاریگه‌ری ئه‌وخۆڵبارینه‌ی له‌به‌ره‌به‌یانی ئه‌مڕۆوه‌ ڕووی له‌پارێزگای سلێمانی كــــردوه‌، نزیكه‌ی(70) هاووڵاتی سه‌ردانی به‌شی فریاكه‌ونتی هه‌ردوو نه‌خۆشخانه‌ی (شار و د.جمال ئه‌حمه‌د ڕه‌شید تایبه‌ت به‌منداڵان ) یان كردوه‌ به‌هۆی هه‌ستیاری به‌خۆڵ بارین و كاریگه‌ریه‌كانی به‌شێكی زۆریان چاره‌سه‌ری پزیشكی پێویسیان بۆكراوه‌و ڕه‌وانه‌ی ماڵه‌وه‌ كراونه‌ته‌وه‌.

هه‌ڵمژینی ئه‌و هه‌وایه‌ی بووه‌ به‌ ته‌پ و تۆز به‌شێوه‌یه‌كی گشتی بۆ ته‌ندروستی مرۆڤ باش نییه‌و كاریگه‌رییه‌كانی خۆڵبارین له‌ڕووی ته‌ندروستیه‌وه‌ بۆ هاووڵاتیان برتییه‌لــــــه‌.
 
1- ده‌بێته‌ هۆی هه‌ستیاری حه‌ساسییه‌ت و پێڵووی چاوه‌كان سورده‌بنه‌وه‌و توشی خوران ده‌بێت.
2- هه‌ستیاری لوت و به‌تایبه‌ت تر ناوپۆشی لوت سور ده‌بێته‌وه‌ تووشی هه‌وكردن ده‌بێته‌وه‌ به‌مه‌ش گیرانی لوت دروست ده‌بێت و كه‌سه‌كه‌ تووشی ته‌نگه‌نه‌فه‌سی ده‌بێت.
3- فشاری خوێن و خوێن به‌ربوون و هه‌وكردنی گوێچكه‌ی ناوه‌ڕاست زۆر جار ده‌رئه‌نجامی ئه‌م خۆڵبارینه‌یه‌ و كاریگه‌ری دروست ده‌كات له‌سه‌ر ئه‌و كه‌سه‌.
4- ئه‌و كه‌سانه‌ی ته‌نگه‌ نه‌فه‌سن و ڕه‌بۆیان هه‌یه‌ له‌گه‌ڵ ئه‌م خۆڵبارینه‌ حاڵه‌ت و نیشانه‌كانیان زیاد ده‌كات.
5- زۆر جار ده‌بێته‌هۆی خورانی پێست و سوربوونه‌وه‌ و نه‌خۆشی ئێكزیما.
6- كاریگه‌ری له‌سه‌ر كۆئه‌ندامی هه‌ناسه‌دان و سییه‌كان دروست ده‌كات و به‌مه‌ش كه‌سه‌كه‌ تووشی كۆكه‌ و پژمین و  ناڕه‌حه‌تی زۆر ده‌بێت چونكه‌ ئه‌و ده‌نكۆڵانه‌ هه‌ڵگری میكرۆب و به‌كتریان.

سه‌ره‌ڕای هۆكارو كاریگه‌رییه‌كان چه‌ندین ڕێگای خۆپارێزی هه‌یه‌ كه‌ پێویسته‌ هاووڵاتیان پابه‌ندی چه‌ند ڕێنمایی  بن له‌ ماڵه‌وه‌. ئه‌وانیش بریتین...

1-  داخستنی ده‌رگاو په‌نجه‌ره‌ و پاككردنه‌وه‌ی شوێنی خۆڵبارین به‌ تایبه‌ت بۆ ئه‌و كه‌سانه‌ی له‌ماڵه‌وه‌ن.
2- له‌ كاتی چونه‌ ده‌ره‌وه‌ ده‌مامك ببه‌سترێ و ڕوو پۆشی خۆت و شوێنی مانه‌وه‌ بكه‌ی به‌به‌رده‌وامی.
3- ده‌رگا و په‌نجه‌ره‌ دابخه‌  ئه‌گه‌ر بۆ حاڵه‌تی  زۆر پێویست نه‌بێت مه‌چۆ ده‌ره‌وه‌.
4- زۆر خواردنه‌وه‌ی شله‌مه‌نی به‌تایبه‌ت له‌كاتی شۆفێری و چونه‌ ده‌ره‌وه‌ هه‌وڵبدرێت هه‌وای ناو ئۆتۆمبێل بكرێته‌وه‌.
5- خواردنی میوه‌ و سه‌وزه‌ به‌به‌رده‌وامی.
6- تێكه‌ڵ نه‌بوونی هاوڵاتیان و مامه‌ڵه‌ نه‌كردنیان له‌گه‌ڵ سه‌گ و پشیله‌ كه‌ له‌ ئێستادا له‌لایه‌ن هاوڵاتیانه‌وه‌ گرنگی زۆری پێده‌درێت ، چونكه‌ ئه‌و تۆز و خۆڵه‌ له‌گه‌ڵ فه‌رووی ئاژه‌ڵه‌كان كێشه‌ دروست ده‌كات.
7- له‌كاتی بوونی هه‌ر حاڵه‌تێكی نه‌خوازراو هاوڵاتیان ده‌توانن په‌یوه‌ندی به‌ هێڵی گه‌رمی ژماره‌ 122بكه‌ن

PUKmedia راگه‌یاندنی ته‌ندروستی سلێمانی