په‌روه‌رده‌ له‌باره‌ی خوێندكاره‌ ئاواره‌كانی شه‌نگال بڕیارده‌دات

وه‌زاره‌تی په‌روه‌رده‌ی په‌روه‌رده‌ی حكومه‌تی هه‌رێمی كوردستان، چه‌ند بڕیارێكی له‌ باره‌ی ئه‌و خوێندكارانه‌ی سنووری شه‌نگال ده‌ركردووه‌ كه‌ به‌هۆی ئاڵۆزییه‌كانی ئه‌م دواییه‌ی ناوچه‌كه‌وه‌، ئاواره‌ی كه‌مپه‌كانی سنووری دهۆك بوون.
ئه‌مه‌ش ده‌قی راگه‌یه‌نراوه‌كه‌: 

ڕاگه‌یه‌نراوێك له‌ وه‌زیری په‌روه‌رده‌ی حكومه‌تی هه‌رێمی كوردستانه‌وه‌ : 
به‌هۆی ئه‌و دۆخه‌ ناسه‌قامگیره‌ی له‌ سنووری قه‌زای شه‌نگال هه‌یه‌، به‌تایبه‌ت ناوچه‌كانی (سنونێ و خانه‌سوور و دووگر)، بۆ پاراستنی به‌رژه‌وه‌ندی ئه‌و قوتابیانه‌ی كه‌ له‌گه‌ڵ خێزانه‌كانیان ڕوویان له‌ سنووری پارێزگای دهۆك كردووه‌  بریارماندا:

١- به‌رێوه‌به‌رایه‌تی گشتیی په‌روه‌رده‌ی دهۆك و په‌روه‌رده‌ی شه‌نگال مان راسپاردووه‌ كه‌ ئه‌و قوتابیانه‌ی سه‌ر به‌ قوتابخانه‌كانی وه‌زاره‌تی په‌روه‌رده‌ی هه‌رێمی كوردستانن ئێستا له‌گه‌ڵ خێزانه‌كانیان ڕوویان له‌ پارێزگای دهۆك كردووه‌ وه‌ له‌كه‌مپه‌كان یان ده‌ره‌وه‌ی كه‌مپه‌كان نیشته‌جێن ده‌توانن له‌  قوتابخانه‌ی ناو كه‌مپه‌كان  و ئه‌وانه‌ی ده‌ره‌وه‌ی كه‌مپه‌كانیش له‌ نزیكترین قوتابخانه‌ خۆیان تۆمار بكه‌ن و تاقیكردنه‌وه‌كانیان ئه‌نجام بده‌ن و پاشان نمره‌كانیان له‌ رێگای به‌رێوه‌به‌رایه‌تی گشتیی په‌روه‌رده‌ی دهۆكه‌وه‌ ده‌چێته‌وه‌  قوتابخانه‌كانی خۆیان، هه‌روه‌ها ئه‌و قوتابیانه‌ی كه‌ به‌هۆی دۆخی  ئێستایان ئاماده‌سازنین بۆ تاقیكردنه‌وه‌ ده‌سه‌ڵاتی ته‌واو ده‌ده‌ین به‌ به‌رێوه‌به‌ری گشتیی په‌روه‌رده‌ی دهۆك له‌ كاتێكی دیكه‌ی گونجاو تاقیكردنه‌وه‌یان بۆ ئه‌نجام بده‌ن به‌جۆرێك هیچ قوتابییه‌ك له‌و قوتابیانه‌ نابێت مافیان بفه‌وتێت به‌هۆی به‌جێهێشتنی شوێنی نیشته‌جێبوونی خۆیانه‌وه‌. 

٢- به‌یانی ئه‌مڕۆ له‌گه‌ڵ وه‌زیری په‌روه‌رده‌ی عیراقی فیدرال په‌یوه‌ندی ته‌له‌فۆنیم ئه‌نجامدا سه‌باره‌ت به‌و قوتابیانه‌ی كه‌ ئێستا له‌گه‌ڵ خانه‌واده‌كانیان ڕوویان له‌ پارێزگای دهۆك كردووه‌ و سه‌ر به‌ قوتابخانه‌كانی وه‌زاره‌تی په‌روه‌رده‌ی عێراقی فیدرالن، داوام لێكرد هه‌موو رێكارێكی گونجاو بگرنه‌ به‌ر بۆ ئه‌وه‌ی مافی ئه‌و قوتابیانه‌ پارێزراو بێت، جه‌نابی وه‌زیری په‌روه‌رده‌ی عیراقی فیدرال به‌ڵێنی دا كه‌ به‌رێوه‌به‌رایه‌تی گشتیی په‌روه‌رده‌ی نه‌ینه‌وا راده‌سپێرن كه‌ هاوشێوه‌ی وه‌زاره‌تی په‌روه‌رده‌ی هه‌رێمی كوردستان هه‌نگاو بنێن و تیمێكی كاركردن دروست بكه‌ن بۆ ئه‌و بابه‌ته‌ و دڵنیایی دا كه‌ هه‌موو رێكارێكی گونجاو ده‌گرنه‌ به‌ر بۆ ئه‌وه‌ی مافی ئه‌و قوتابیانه‌ نه‌فه‌وتێت. 

PUKmedia وه‌زاره‌تی په‌روه‌رده‌ی هه‌رێم