خۆبەخشانی تەندروستی: بافڵ جەلال تاڵەبانی بەڵێنی هەموو هاوكارییەكی پێداین

ئێواره‌ی ئه‌مڕۆ 30-4-2022، بافڵ جه‌لال تاڵه‌بانی له‌ ده‌باشان له‌گه‌ڵ نوێنه‌رانی خۆبه‌خشانی ته‌ندروستی كۆبووه‌وه‌.

 له‌ دوای كۆبوونه‌وه‌كه‌ش نوێنه‌ری خۆبه‌خشانی ته‌ندروستی له‌ كۆنگره‌یه‌كی رۆژنامه‌نووسیدا ناوه‌ڕۆكی كۆبوونه‌وه‌كه‌یانی له‌گه‌ڵ ، بافڵ جه‌لال تاڵه‌بانی  ئاشكراكردو رایگه‌یاند؛ بافڵ جه‌لال تاڵه‌بانی له‌ نزیكه‌وه‌ گوێی له‌ داواكارییه‌كانمان گرت و وه‌كو خۆبه‌خشانی ته‌ندروستی سه‌رجه‌م ئه‌و داواكارییانه‌ی كه‌ هه‌مان بوو خستمانه‌ڕوو، به‌تایبه‌ت ئه‌و زوڵم و سته‌مه‌ی كه‌ له‌لایه‌ن وه‌زاره‌تی ته‌ندروستی حكومه‌تی هه‌رێمی كوردستانه‌وه‌ له‌ پارێزگای سلێمانی ده‌كرێت .

وتیشی: له‌ كۆبوونه‌وه‌كه‌ماندا بافڵ جه‌لال تاڵه‌بانی به‌ڵێنی هه‌موو هاوكارییه‌كی پێداین و به‌ڵێنی ئه‌وه‌شی پێداین سه‌رجه‌م داواكارییه‌كانمان بۆ جێبه‌جێبكات.

هه‌روه‌ها له‌ چه‌ند خاڵێكدا ته‌واوی ناوه‌ڕۆكی كۆبوونه‌وه‌كه‌یان له‌گه‌ڵ بافڵ جه‌لال تاڵه‌بانی بۆ كه‌ناڵه‌كانی راگه‌یاندن خسته‌ڕوو، وتیان: بافڵ جه‌لال تاڵه‌بانی رایگه‌یاندوه‌: له‌ دونیادا خه‌ڵكانێكی به‌ڕێزی وه‌كو ئێوه‌ نه‌ماوه‌ كه‌ به‌له‌خۆبردویی و له‌سه‌ر ئه‌رك و گیرفانی خۆی خزمه‌تی نه‌خۆشخانه‌كان بكات و نه‌هێڵت كه‌رتی ته‌ندروستی وڵات په‌كی بكه‌وێت، له‌به‌رامبه‌ریشدا ده‌سه‌ڵاتدارانی كه‌رتی ته‌ندروستی بێباكبن به‌رامبه‌ریان، بۆیه‌ به‌ڵێنی پێداین هه‌رشتیَك كه‌ له‌ توانای ئه‌ودابێت بۆ خۆبه‌خشانی ته‌ندروستی بیكات .

 وتیشی: هه‌روه‌ها بڕیاردرا لیژنه‌یه‌ك له‌ خۆبه‌خشانی ته‌ندروستی پێكبهێنرێت به‌ناوی بافڵ جه‌لال تاڵه‌بانییه‌وه‌ كه‌ لیژنه‌كه‌ له‌ راپۆرتێكدا به‌ڵگه‌و پێداویستییه‌كانی خۆبه‌خشانی ته‌ندروستی و ئه‌و زوڵم و سته‌مه‌ی كه‌ له‌و توێژه‌ كراوه‌ تێیدا ئاماژه‌پێبدرێت ، هه‌روه‌ها به‌ڵگه‌كان له‌سه‌ر داته‌پینی كه‌رتی ته‌ندروستی له‌ سلێمانی و ئه‌و به‌ڵگه‌كانی كاركردن دژی كه‌رتی ته‌ندروستی ئه‌م شاره‌ی تێیدا كۆبكرێته‌وه‌ ، بڕیاریشدراوه‌ 8 ی مانگی 5ی 2022، لیژنه‌كه‌ كۆبێته‌وه‌ و له‌ 9 ی مانگی داهاتووش خودی لیژنه‌كه‌ بۆ جارێكی تر له‌گه‌ڵ بافڵ جه‌لال تاڵه‌بانی كۆبێته‌وه‌ .

هه‌روه‌ها وتی: بافڵ جه‌لال تاڵه‌بانی له‌كۆتایی كۆبوونه‌وه‌كه‌دا رایگه‌یاند: به‌لامانه‌وه‌ گرنگ نییه‌ خۆبه‌خشانی ته‌ندروستی سه‌ربه‌ چ حزب و لایه‌نێكن، بۆیه‌ به‌بێ گوێدانه‌ ئینتمایی سیاسی، ئێمه‌ بێ جیاوازی كار بۆ هه‌موو خۆبه‌شان ده‌كه‌ین و به‌هه‌موو توانامانه‌وه‌ له‌ رێگه‌ی تیمی یه‌كێتی له‌ حكومه‌تی هه‌رێم و فراكسیۆنی یه‌كێتی له‌ په‌رله‌مانی كوردستان هه‌وڵی چاره‌سه‌ركردنی سه‌رجه‌م كێشه‌كان ده‌ده‌ین.

PUKmedia