شاعیرێكی ناوداری عیراق كۆچی دواییكرد

نێوەندە رۆشنبیرییەكانی عیراق سەرەخۆشی خۆیان بۆ كۆچی دوایی حەسەب شێخ جەعفەر شاعیری ناوداری عیراق راگەیاند كەئەمڕۆ لەتەمەنی 80 ساڵیداو بەهۆی نەخۆشییەوە كۆچی دوایكرد.
یەكێتیی گشتی ئەدیبان و نووسەرانی عیراق ئەمڕۆ 11ی 4ی 2022 بەیاننامەیەكیان بۆ  كۆچی دوایی شاعیری گەورە حەسەب شێخ جەعفەر دەركرد.
یەكێتیی ئەدیبان و نووسەرانی عیراق لەبەیاننامەكەیاندا كەوێنەیەكی دەست PUKmedia كەوتووە، راشیانگەیاند: حەسەب شێخ جەعفەر ساڵی 1942 لەناحیەی هۆر سەلام لەشاری عەمارە لەباشووری عیراق لەدایكبووەو خوێندنی سەرەتایی و ئامادەیی هەر لەپارێزگای میسان تەواوكردووەو لەساڵی 1969داو ئەو كاتەی تەمەنی دەبێت بە 18 ساڵ بەمەبەستی خوێندن و بەدەستهێنانی بڕوانامەی لیسانس و ماجستێر لەپەیمانگای گۆركی بۆ ئەدەب روودەكاتە مۆسكۆ، لەساڵی 1965 بەسەركەوتوویی خوێندنی لەو پەیمانگایە تەواوكردو توانی بڕوانامەی ماجستێر لەئەدەبدا بەدەستبهێنێت.
پاشان دەگەڕێتەوە بۆ وڵات و لەبواری رۆژنامەنووسی و بەرنامە رۆشنبیرییەكانی ئێستگەدا كاریكردووە، هەروەها وەك سەرنووسەر لەرۆژنامەیەكی رۆشنبیری لە بەغدا كاریكردووە، لەساڵی 1969ەوە تاوەكو ساڵانی نەوەدەكانی سەدەی رابردوو، ئەندامی دەستەی كارگێڕیی یەكێتیی گشتی ئەدیبان و نووسەرانی عیراق بووەو بەشداری لەچەندین كۆڕو كۆبوونەوەی ئەدەبی و شیعریدا لەعیراق و وڵاتە عەرەبییەكان و یەكێتی سۆڤیەتی جاران كردووە، چەندین دیوانە شیعریشی بەچاپ گەیاندووە.
لەپای كارە شیعرییەكانیشیدا چەندین خەڵاتی بەدەستهێناوە، لەوانە: خەڵاتی ئاشتی لەیەكێتی سۆڤیەت لەساڵی 1983دا، خەڵاتی خوولی هەشتەمی دامەزراوەی رۆشنبیری سوڵتان بن عەلی ئەلعوەیس بۆ شیعر لەساڵی 2002-2003دا.
PUKmedia تایبەت