داوای قەدەغەكردنی فرۆشتنی چپس و شیرینی لە خوێندنگاكان دەكرێت

بەڕێوەبەری نەخۆشخانەی د. جەمال ئەحمەد رەشیدی منداڵان، داوا دەكات فرۆشتنی چپس و شیرینی و نەستەلە لە فرۆشگای خوێندنگاكان قەدەغە بكرێن و میوە و چەرەسات و بابەتی تر بفرۆشرێن. 

دكتۆر پشدەرعەبدوڵڵا ئیسماعیل بەڕێوەبەری نەخۆشخانەی د. جەمال ئەحمەد رەشیدی منداڵان، لە نووسراوێكدا داوایەكی ئاڕاستەی بەڕێوەبەرایەتی گشتی تەندروستی سلێمانی كردووە و دەڵێت: پێویستە چاو بخشێنرێتەوە بە فرۆشگای قوتابخانەكانی سلێمانی و دەوروبەریدا، بۆ باشكردنی كوالێتی و جۆری ئەو خواردەمەنییانەی بە خوێندكاران دەفرۆشرێن. 

راشیگەیاندووە: پێویستە فرۆشتنی چپس و شیرینی و نەستەلە و شەربەتی تۆزی گیراوە قەدەغە بكرێن، چونكە زیانی گەورەیان بۆ تەندروستی منداڵان ھەیە،  ئەو منداڵانەشی نەخۆشی شەكرەیان ھەیە كاریگەری خراپیان لەسەر دروست دەبێت و كۆنترۆڵی شەكرەیان لە دەستدەدەن. 

هاوكات داواشیكردووە: لە بری ئەو خواردنانە، جۆرەكانی میوە و چەرەسات و شیر و نۆكاو و پاقلەی كوڵاو و ھێلكەی كوڵاو و چەند بابەتێكی تر بفرۆشرێن، ئەوەش لە ژێر چاودێری تەندروستیدا.

PUKmedia تایبەت