یه‌كێتی مامۆستایان: بڕیاره‌كه‌ی وه‌زاره‌تی په‌روه‌رده‌ دره‌نگ كه‌وت

دوای راگه‌یاندنی ژماره‌یه‌ك بریاڕ له‌لایه‌ن وه‌زاره‌تی په‌روه‌رده‌ی حكومه‌تی هه‌رێم، له‌باره‌ی پێداچونه‌وه‌ به‌ وانه‌كانی زمان له‌ناوه‌نده‌كانی خوێندن و بایه‌خدانی زیاتر به‌زمانی كورددی، سه‌رۆكی یه‌كێتی مامۆستایانی كوردستان رایده‌گه‌یه‌نێت بڕیاره‌كان گرنگ و پێویست بوو، له‌گه‌ڵ ئه‌وه‌ش دره‌نگه‌ و ده‌بوو زووتر ده‌ربكرێت.

عه‌بدولواحید مه‌حه‌مه‌د سه‌رۆكی یه‌كێتی مامۆستایانی كوردستان له‌و باره‌یه‌وه‌ به‌ PUKmedia ی راگه‌یاند: ماوه‌یه‌كی زۆره‌ هه‌ستمانكردووه‌ كه‌مكوری له‌بابه‌ته‌كانی زمانی كوردی له‌ناوه‌نده‌كانی خوێندن هه‌یه‌ و چه‌ندین جار وه‌زاره‌تی په‌روه‌رده‌و لایه‌نی په‌یوه‌ندارمان له‌و باره‌یه‌وه‌ ئاگه‌داركردۆته‌وه‌، كه‌چی وه‌كو پێویست به‌هه‌ندوه‌رنه‌گیراوه‌.

وتیشی: ئێستاش كه‌ وه‌زاره‌تی په‌روه‌رده‌ چه‌ند بڕیارێكی له‌باره‌ی زمانی كوردی ده‌ركردووه‌، تاكو  له‌ناوه‌نده‌كانی خوێندن پێداچونه‌وه‌ و بایه‌خی زیاتری  پێبدرێت، به‌هه‌نگاوێكی باشی ده‌زانین، له‌گه‌ڵ ئه‌وه‌ش پێمانوایه‌ كاته‌كه‌ی دواكه‌وتووه‌، ده‌بوو زووتر  ئاوڕله‌و بابه‌ته‌ بدرێته‌وه‌.

راشیگه‌یاند: ده‌ركردنی بڕیار گرنگه‌، به‌ڵام له‌وه‌ گرنگتر جێبه‌جێكردنیه‌تی له‌ ئه‌رزی واقع، به‌تایبه‌تی  پرسی زمانی دایك، كه‌ هاوشێوه‌ی مێژووی میلله‌تان،  دووبابه‌تی زۆر گرنگ و چاره‌نوسسازن، به‌جۆرێك له‌ وڵاته‌ پێشكه‌وتووه‌كان بایه‌خی زۆری پێده‌درێ و له‌كاره‌ له‌پێشینه‌كانی داموده‌زگا په‌روه‌رده‌ییه‌كانیان داده‌ندرێت.

سه‌رۆكی یه‌كێتی مامۆستایانی كوردستان پێشیوابوو: ئه‌گه‌ری بابه‌تی زمانی كوردی له‌ناوه‌نده‌كانی خوێندنی حكومی گرنگ و پێویست بێت، ئه‌وا بۆ خوێندگا تایبه‌ت و ئه‌هلییه‌كانیش به‌هه‌مانشێوه‌یه‌، چونكه‌ ده‌بێت سه‌رجه‌م خوێندنگا حكومی و تایبه‌ته‌كان له‌ژێر چه‌تری وه‌زاره‌تی په‌روه‌رده‌ دابن و رێنمایی و بڕیاره‌كانی حكومه‌ت جێبه‌جێ بكه‌ن.

عه‌بدولواحید مه‌حه‌مه‌د ئه‌وه‌شی خسته‌روو: جگه‌ له‌ لایه‌نی وه‌زاره‌تی په‌روه‌رده‌ ، له‌سه‌ر وه‌زاره‌تی خوێندنی باڵا و توێژینه‌وه‌ی  زانستیش پێویسته‌ مامۆستای به‌توانا و پڕ زانست و زانیاری ئاماده‌بكه‌ن، تاكو بتوانن به‌باشی ئه‌ركاكانی خۆیان له‌ناوه‌نده‌كانی خوێندن جێبه‌جێ بكه‌ن، به‌تایبه‌تی ئه‌وه‌ی په‌یوه‌ندی به‌ بابه‌تی زمانه‌وه‌ هه‌یه‌.

هاوكات سه‌رۆكی یه‌كێتی مامۆستایان كردنه‌وه‌ی خولی راهێنان بۆ مامۆستایان به‌شێوه‌یه‌كی به‌رده‌وام و ته‌واوكردنی پڕۆگرامی ساڵی خوێندن، كه‌ به‌ گوێره‌ی ستانداردی جیهانی 200رۆژ و 900 سه‌عات بۆ ساڵی خوێندن داندراوه‌، به‌مه‌رجی سه‌ره‌كی زانی له‌وه‌ی پرۆسه‌ی په‌روه‌رده‌و خوێندن سه‌ركه‌وتووبێت.

PUKmedia ته‌ها عه‌بدوڵڵا