شاجوانی ئه‌ڵمانیا هه‌ڵبژێردرا

به‌پێی نه‌ریته‌كانی هه‌ڵبژاردنی شاجوانی له‌ئه‌ڵمانیا ، پێوه‌ره‌كان ته‌نها له‌سه‌ر جوانی ڕووخسار نییه‌و دادوه‌ره‌كان جگه‌له‌ جوانی ڕوو وبه‌ژن وباڵاو فۆرمی زۆربه‌ی ئه‌ندامانی له‌ش، كه‌سایه‌تی و ڕه‌وشت و ئاكار وبه‌هاكانیشی ده‌كه‌نه‌ پێوه‌ر، واته‌ لایه‌نی مرۆڤایه‌تی وهه‌ست و نه‌سته‌كانی ناوه‌وه‌شی حساب ده‌كرێت.

له‌دوو ڕۆژی ڕابردووا له‌ ڕێوره‌سمی هه‌ڵبژاردنی شاجوانی ئه‌ڵمانیا كچێكی به‌ڕه‌گه‌ز به‌رازیلی37 ساڵ به‌ناوی " دۆمیتیلا بارۆس" یه‌كه‌می هێناو بوو به‌ شاجوانی ئه‌ڵمانیا بۆ ئه‌مساڵ Miss Germany 2022  ئه‌و كچه‌ ژینگه‌پارێزو مرۆڤدۆسته‌، له‌ته‌مه‌نی لاوێتی و دوای ته‌واوكردنی خوێندنی له‌ ڤاڤێلای به‌رازیل له‌ پڕۆژه‌یه‌كی باوكیدا به‌شداریكردووه‌ وخۆبه‌خشانه‌ وانه‌ی به‌ منداڵانی سه‌رجاده‌و خێزانه‌ هه‌ژاره‌كان گوتۆته‌وه‌، ئه‌وانه‌ی كه‌ له‌به‌ر ده‌ستكورتی ناهۆشیاری دایك وباوكه‌كانیان ده‌رفه‌تی چوونه‌ خوێندنگه‌یان نه‌بووه‌ له‌و پۆله‌ی باوكی كه‌ سه‌رپه‌رشتیكردووه‌ فێری خوێندن ونووسینی كردوون وڕۆژی ده‌رسێكیشی بۆ مۆسیقاو سه‌ما ته‌رخان كردووه‌، له‌و گه‌ڕه‌كه‌ هه‌ژاره‌ی كه‌لێی ژیاوه‌و په‌روه‌رده‌ بووه‌ هه‌وڵیداوه‌ جۆرێك له‌ دادپه‌روه‌ری كۆمه‌ڵایه‌تی له‌گه‌ڵ ده‌رودراوسێ وهاوڕێكانیدا پیاده‌ بكات و هانده‌رێكی خه‌ڵكی بێت بۆ ژینگه‌پارێزی وپاك وخاوێن ڕاگرتنی كۆڵان وشۆسته‌كانیان، له‌سه‌ر ئه‌و خزمه‌تانه‌ی له‌لایه‌ن نه‌ته‌وه‌یه‌كگرتوه‌كانه‌وه‌ خه‌لاتێكی به‌نرخی پێبه‌خشراوه‌.

شاجوان ئێستا كچه‌ مۆدێل ونمایشكه‌ری جلوبه‌رگ وچالاكوانێكی دیاری تۆڕه‌ كۆمه‌لایه‌تییه‌كانه‌، له‌به‌رلینی پایته‌خت ده‌ژی و وه‌ك خۆی ده‌ڵێت ده‌یه‌وێت له‌ڕێی شاجوانیه‌وه‌ بره‌و به‌ خزمه‌ته‌كانی بۆ كۆمه‌ڵگا بدات و خه‌باته‌كانی بۆ دادپه‌روه‌ری ومرۆڤدۆستی وخۆشه‌ویستی و به‌هاجوانه‌كانی مرۆڤ بره‌و پێ بدات، له‌دوای وه‌رگرتنی ئه‌و نازناوه‌شی سڵاو وڕێزو سوپاسگوزاری بۆ باوكی نارد.

شایانی باسه‌ 95  ساڵ له‌و وڵاته‌ شاجوان هه‌ڵده‌بژیردرێت ئه‌مساڵیش له‌ Europark  له‌هه‌رێمی بادن ڤۆرتمبێرگ ڕێوره‌سمه‌كه‌ ڕێكخراو پێستر 12000 كچ به‌شداریان كردبوو ته‌نها 11 یان چووبوونه‌ خولی كۆتایی و یه‌كه‌م و دووه‌م و سێیه‌م هه‌ڵبژێردران.

PUKmedia ئه‌ڵمانیا- بورهان ئه‌مین 
سه‌رچاوه‌/ ڕۆژنامه‌ی Bild