یه‌كێتی مامۆستایان: شانازی به‌ژنان و كچانی مامۆستایانه‌وه‌ ده‌كه‌ین

یه‌كێتی مامۆستایانی كوردستان مه‌كته‌بی سكرتاریه‌ت له‌دژی هه‌ندێك لێدوانی نه‌شیاو راگه‌یه‌نراوێك بڵاوده‌كاته‌وه‌و ئاماژه‌ بۆ ئه‌وه‌ده‌كات، شانازی به‌ بوونی كچان و ژنانی مامۆستایانه‌وه‌ ده‌كه‌ین له‌چوارچێوه‌ی پرۆسه‌ی په‌روه‌رده‌دا.

ده‌قی راگه‌یه‌نراوه‌كه‌...

یه‌كێك له‌شاكاره‌ جوان و پڕ بایه‌خه‌كان كه‌ هه‌میشه‌ شانازی پێوه‌ ده‌كه‌ین و دنیای پێشكه‌وتن و شارستانیه‌تیشی پێوه‌ به‌ستراوه‌ته‌وه‌، وجودی كچان و ژنانی مامۆستایه‌ به‌ رێژه‌یه‌كی زۆرتر له‌پیاوان له‌چوارچێوه‌ی پرۆسه‌ی په‌روه‌رده‌دا هه‌روه‌ها تێكه‌ڵاو بوونی ره‌گه‌زی نێرو مێیه‌ له‌ ناوه‌نده‌كانی خوێندن، سه‌رباری ئه‌وه‌ ئه‌ركی دایكایه‌تیش ده‌بینن، واته‌ ئه‌و خاتونانه‌ دوو ئه‌ركی بوونیادیان له‌سه‌ره‌، یه‌كیان مامۆستایه‌تی و ئه‌ویتریشیان دایكایه‌تی كه‌ هه‌ردووكیان یه‌ك له‌ یه‌ك قورستره‌، هه‌ر بۆیه‌ وتراوه‌ ((ژنان نیوه‌ی كۆمه‌ڵن و دایكی نیوه‌كه‌ی ترن))، كه‌سیش نیه‌ ئه‌و راستیه‌ نه‌زانێ، له‌ هه‌شت ساڵی رابردوودا به‌ ده‌ست دواكه‌وتن و پاشه‌كه‌وت و بڕینی موچه‌وه‌ ئازاری زۆریان به‌ركه‌وتوه‌، بۆیه‌ یه‌كێتی مامۆستایانی كوردستان، له‌ كاتێكدا رۆڵ و ئه‌ركی ئه‌و به‌ڕێزانه‌ زۆر به‌ گرنگ لێكده‌داته‌وه‌، له‌ هه‌مان كاتیشدا هه‌ر جۆره‌ لێدوان و توانج و سه‌رنجی نه‌شیاو له‌لایه‌ن هه‌ر به‌رپرسێكه‌وه‌ بێت ره‌تده‌كاته‌وه‌ و به‌ ناڕه‌وای ده‌زانێ، هه‌رگیز نابێت كاری ئیداری و رۆتینی رۆژانه‌ له‌مه‌ڕ پێدراوی یاسایی ئه‌و دایك و خوشكانه‌مان ببێته‌ هۆكار بۆ توانج گرتن و تانه‌ لێدان، وه‌ك رێكخراوێكی داكۆكیكار له‌ پڕۆسه‌یه‌كی په‌روه‌رده‌یی باش و مامۆستایانی خۆشه‌ویست ئه‌م ده‌سته‌واژه‌یه‌ ((ئه‌وه‌ی قوڕی به‌سه‌ری په‌روه‌رده‌ كردووه‌ 60% مامۆستایانی ژنن)) هه‌روه‌ها هه‌ر لێدوان و ده‌سته‌واژه‌یه‌كیتر ببێته‌ مایه‌ی نیگه‌رانی و به‌هه‌ند وه‌رنه‌گرتنی ئه‌ركی ئه‌و خاتونه‌ سه‌لار و چه‌له‌نگانه‌، نه‌ له‌ ئێستادا قابیلی قبوڵه‌ نه‌ له‌ ئاینده‌ش قبوڵی ده‌كه‌ین بگره‌ پرۆتستۆشی ده‌كه‌ین، ئه‌وه‌ی له‌ روی یاساییه‌وه‌ بۆمان بكرێت ده‌یكه‌ین بۆ ئه‌وه‌ی ببێته‌ سنورێك بۆ ئه‌و كه‌سانه‌ی زاتی ئه‌وه‌ بكه‌ن په‌نجه‌ بۆ مامۆستایان به‌گشتی و دایكان و خوشكانمان به‌ تایبه‌تی درێژ بكه‌ن.

 یه‌كێتی مامۆستایانی كوردستان
مه‌كته‌بی سكرتاریه‌ت
16/2/2022

PUKmedia تایبه‌ت