هەڵویستی یەكێتی مامۆستایان لەبارەی پشوەكانی خوێندن

دوای ئەوەی وەزارەتی پەروەرەدە خشتەی پشوەكانی مانگی ئادارو نەورۆزی ئەمساڵی لەناوەندەكانی خوێندن لە هەرێمی كوردستان راگەیاند، یەكێتی مامۆستایانی كوردستان بۆچوونی خۆی لەبارەی ئەو پشوانە و كاریگەری لەسەر پڕۆسەی خوێندن دەخاتەروو و ئاماژە بەوەدەكات راگەیاندنی ئەو ماوەیە بۆ پشوو چاوەڕواننەكراو بوو.
عەبدولواحید مەحەمەد سەرۆكی یەكێتی مامۆستایانی كوردستان بە PUKmediaی راگەیاند: راستە ساڵانە لەمانگی ئادار چەند رۆژێك وەك پشوو بەبۆنەی نەورۆز و یادەكانی راپەڕین رادەگەیەنرێت، بەڵام  پێویست بوو بۆ ئەمساڵ رەچاوی پڕۆسەی پەروەردەو خوێندن بكرایە، بەوپێیەی لەدوو ساڵی رابردوو كاتێكی زۆر بەهۆی رێكارەكانی خۆپارێزی لە ڤایرۆسی كۆرۆنا بەفیڕۆچووە.
وتیشی: راگەیاندنی پشووەكانی ئەمساڵ  لەناوەندەكانی خوێندن كە لە 11-3-2022 بۆ 24-3-2022 جگە لەچەند رۆژێك دیاریكراوە، ئەمەش كاتێكی زۆرەو خوێندكار لە -خوێندن سارد دەكاتەوە، بەتایبەتی دەبینین لەناو پشوەكان چەند رۆژێك دەوامی خوێندن دەكرێتەوە.
سەرۆكی یەكێتی مامۆستایان ئاماژەی بەوەشكرد:لەكاتی راگەیاندنی پشوەكان یان هەر بڕیارێكی تایبەت بەخوێندن، وەزارەتی پەروەردەی حكومەتی هەرێم وەكو پێویست گوێ لە یەكێتی مامۆستایان و پسپۆڕان و راوێژكاران ناگرێت و پێشنیارەكانیان بەهەند وەرناگیرێت، هاوكات بڕیارەكان بەجۆرێك دەردەچێت كەمتر خوێندنەوەی بۆ دەكرێت.
PUKmedia تەها عەبدوڵڵا