داوای كه‌مكردنه‌وه‌ی پشووه‌كانی نه‌ورۆز ده‌كرێت

به‌هۆی زۆری پشووه‌كانی سه‌ری ساڵ و ئاسته‌نگه‌كانی كه‌شوهه‌وا، ماوه‌ی زیاترله‌ 35 رۆژه‌ جگه‌ له‌ كاتی تاقیكردنه‌وه‌كان،  ده‌وامی خوێندگاكان له‌هه‌رێمی كوردستان راگیراوه‌، سه‌رپه‌رشتیارێكی په‌روه‌رده‌یش هۆشداریی ده‌دا له‌وه‌ی ئه‌گه‌ر پشووه‌كان مانگی ئازارو نه‌ورۆز كه‌م نه‌كرێنه‌وه‌ ناتوانرێت پرۆگرامی ئه‌مساڵی خوێندن ته‌واو بكرێت.

عیسا حسێن سه‌رپه‌رشتیاری په‌روه‌رده‌یی له‌سنوری پارێزگای هه‌ولێر به‌ PUKmedia ی راگه‌یاند: بڕیاری وه‌زاره‌تی په‌روه‌رده‌ له‌باره‌ی پشوه‌كانی سه‌ری ساڵ،  كه‌ زیاتر له‌ 10 رۆژی خایاند بڕیاێكی هه‌ڵه‌بوو نه‌ده‌بوو بدرێت، چونكه‌ راگه‌یاندنی ئه‌و پشووه‌ كه‌ به‌هۆی تاقیكردنه‌وه‌كانی وه‌رزی یه‌كه‌م و  خراپی كه‌شوهه‌وا بۆ 35 رۆژ درێژه‌ی كێشا.

وتیشی: دابڕانی خوێندكاران له‌خوێندن بۆ ماوه‌ی زیاتر له‌مانگێك، وایكرد پلان و به‌رنامه‌ی ده‌وامی خوێندن گۆڕانكاری به‌سه‌ردابێت و نه‌توانرێت وه‌كو ئه‌وه‌ی له‌سه‌ره‌تاوه‌ دانراوه‌ جێبه‌جێ بكرێت، به‌تایبه‌تی ئه‌وه‌ی په‌یوه‌ندی به‌ ته‌واوكردنی پرۆگرامی خوێنده‌وه‌ هه‌یه‌.

سه‌رپه‌رشتیاره‌كه‌ی په‌روه‌ره‌ده‌ راشیگه‌یاند: ئێستاش ئه‌گه‌ر پشووه‌كانی داهاتوو، به‌تایبه‌تی له‌ مانگی ئازارو نه‌ورۆز كه‌م نه‌كرێنه‌وه‌، ناتوانرێت پرۆگرامی ئه‌مساڵی خوێندن ته‌واوبكرێت، بۆیه‌ پێویسته‌ وه‌زاره‌تی په‌روه‌رده‌ قه‌ره‌بووی ئه‌و ماوه‌یه‌ بكاته‌وه‌، كه‌ كه‌رتی په‌روه‌رده‌ به‌هۆی پشووكانی سه‌ری ساڵ له‌ده‌ستی چووه‌.
ئاماژه‌ی به‌وه‌شكرد: له‌دووساڵی رابردوو به‌هۆی ڤایرۆسی كۆڕۆناوه‌ زیانێكی زۆر به‌ كه‌رتی په‌روه‌رده‌ كه‌وت، بۆیه‌ ناكرێت به‌ هیچ بیانویه‌ك پرۆسه‌ی په‌روه‌رده‌ په‌كبخرێت و كاتی زیاتر به‌فیرۆبدرێت.

 PUKmedia ته‌ها عه‌بدوڵڵا / هه‌ولێر