چۆن حه‌ز و ئاره‌زووی منداڵ ڕ‌ێكبخه‌ین ؟

بێرتراند ڕ‌ه‌سڵ ده‌ڵێت: منداڵ ده‌زانێت، به‌ڵام زانینه‌كه‌ی پێویستی به‌ ئاڕ‌استه‌كردن هه‌یه‌، واتا ئاڕ‌استه‌كردنی ئه‌و حه‌زو خولیایه‌ی كه‌ هه‌یه‌تی.
 تابتوانێت كه‌سایه‌تییه‌كی به‌هێزو پشت به‌خۆ به‌ستووی هه‌بێت، ئه‌م ئه‌ركه‌ش ده‌كه‌وێته‌ ئه‌ستۆی دایك و باوك و فێرگه‌. بۆ ئه‌م مه‌به‌سته‌ PUKmedia گفتوگۆی كرد له‌گه‌ڵ پسپۆڕ‌ی په‌روه‌رده‌یی، سارا سه‌عیدی و چه‌ند پرسیارێكمان ئاڕ‌استه‌ كرد.

چۆن حه‌ز و ئاره‌زووی منداڵ ڕ‌ێكبخه‌ین ؟
وه‌ڵام: ده‌بێت بزانین ئاره‌زووه‌كانی منداڵ تا چه‌ند له‌ ژیانی واقیعییه‌وه‌ نزیكه‌، به‌هره‌ی منداڵه‌كه‌ له‌و ئاره‌زووه‌ی كه‌ هه‌یه‌تی تا چه‌نده‌؟ هه‌وڵبده‌ین به‌پێی توانا و به‌هره‌كه‌ی هه‌ڵسوكه‌وتی له‌گه‌ڵدا بكه‌ین و بیبه‌ینه‌ پێشه‌وه‌ به‌گوێره‌ی حه‌ز و ئاره‌زووه‌كه‌ی. ده‌بێت حه‌ز و ئاره‌زووه‌كانی به‌پێی ڕ‌یزبه‌ندی كامیان گرنگتره و كامیان نزیكتره‌ جیای بكه‌ینه‌وه‌ و  هه‌وڵبده‌ین ئێم هانده‌رێكی باش بین و ئه‌و كه‌شه‌ی بۆ بڕ‌ه‌خسێنین كه‌ نزیك بێته‌وه‌ له‌و حه‌زه‌ و به‌هره‌ كه‌ هه‌یه‌تی.

چ كاتێك هونه‌ر ده‌بێته‌ به‌شێك له‌ كاری منداڵ؟
وه‌ڵام: له‌ ڕ‌استیدا هیچ ته‌مه‌نێك بێبه‌ش نییه‌ له‌ هونه‌ر، هه‌موو ته‌مه‌نه‌كان هونه‌ری تیایه‌، به‌ڵام تا چ ڕ‌ادده‌یه‌ك منداڵ له‌ ڕ‌ێگه‌ی هونه‌روه‌ ده‌توانێت كاره‌كانی بباته‌ پێشه‌وه‌، هه‌ندێك له‌ منداڵان هه‌ن حه‌زیان له‌ هونه‌ر نییه‌، هه‌ندێك منداڵیش هه‌ن حه‌زیان لێیه‌، به‌ڵام له‌ ته‌مه‌نی دوو ساڵه‌وه‌ ده‌توانین هونه‌ر تێكه‌ڵ بكه‌ین له‌گه‌ ڵ ئیشه‌كانی منداڵ. پێش دوو ساڵیش ده‌توانین به‌شداری پێبكه‌ین.

دایك و باوك  فێرگه‌ چی بكه‌ن له‌گه‌ڵ حه‌ز و ئاره‌زووه‌كانی منداڵ؟
وه‌ڵام: هه‌ر وه‌ك ئاماژه‌م پێدا، ئه‌گه‌ر ئێمه‌ تێستێكمان هه‌بێت له‌سه‌ر ئایكیوی منداڵه‌كان بتوانین حه‌ز و ئاره‌زووه‌كان ڕ‌یزبه‌ندی بكه‌ین بزانین كامه‌یان گرنگه‌، كامه‌یان بۆ منداڵه‌كه‌ گونجاوه‌ به‌پێی كۆمه‌ڵگا، به‌پێی بنه‌ماڵه‌، به‌پێی حه‌ز و ئاره‌زووی خۆی، جگه‌ له‌ هه‌موو ئه‌مانه‌ به‌پێی به‌هره‌ی خۆی ده‌توانین هانده‌رێكی باش بین و په‌ره‌ بده‌ین به‌م توانایه‌.

PUKmedia ئا/ چنار عه‌زیز