راگه‌یه‌نراوی هاوبه‌شی كۆبوونه‌وه‌ی یه‌كێتی و پارتی

 له‌ كۆبوونه‌وه‌ی هاوبه‌شی هه‌ردوو مه‌كته‌بی سیاسی یه‌كێتیی نیشتمانیی كوردستان و پارتی دیموكراتی كوردستان به‌ میوانداری بافڵ جه‌لال تاڵه‌بانی، له‌ ده‌باشان گفتوگۆ له‌سه‌ر دۆخی سیاسی عیراق له‌ دوای هه‌ڵبژاردنه‌كان كرا.

ده‌قی راگه‌یه‌نراوی هاوبه‌شی كۆبوونه‌وه‌ی یه‌كێتیی نیشتمانیی كوردستان و پارتی دیموكراتی كوردستان له‌ ده‌باشان.
كۆبوونه‌وه‌ی هاوبه‌شی پارتی دیموكراتی كوردستان و یه‌كێتیی نیشتمانیی كوردستان به‌میوانداری بافڵ جه‌لا تاڵه‌بانی له‌ ده‌باشان سازكرا.
 له‌ كۆبوونه‌وه‌كه‌دا كه‌ ئه‌مڕۆ 19-12-2021، به‌ڕێوه‌چوو، گفتوگۆ له‌ سه‌ر چه‌ند ته‌وه‌رێكی گرنگ كرا تایبه‌ت به‌ دۆخی سیاسی عیراقی دوای هه‌ڵبژاردنه‌كانی 10 ی ئۆكتۆبه‌ری رابردوو و ئیستیحقاقه‌كانی كورد و یه‌كخستنی كورد و یه‌كخستنی هه‌ڵوێستی كوردستانی و سه‌رجه‌م دۆسیه‌ گرنگه‌ نه‌ته‌وه‌یی و نیشتمانییه‌كان له‌ به‌غدا.
 هه‌وڵدان بۆ گه‌ڵاڵه‌ی كۆتایی كارنامه‌یه‌كی هاوبه‌شی كوردستانی له‌ سه‌ر بنچینه‌ی شه‌راكه‌تی راسته‌قینه‌ و ته‌وافوق و ته‌وازونی ده‌ستوری، وه‌ك له‌ عیراقی نوێدا له‌ سه‌ری پێكهاتبووین، به‌شێكی تر بوو له‌ ته‌وه‌ره‌كانی كۆبوونه‌وه‌كه‌، هه‌ردوولاش كۆكبوون له‌سه‌ر ئه‌وه‌ی پشتیوانی حكومه‌تی هه‌رێمی كوردستان بكه‌ن بۆ چاره‌سه‌ركردنی كێشه‌كان له‌ هه‌موو روویه‌كه‌وه‌ به‌ تایبه‌تی له‌ رووی گوزه‌ران و مووچه‌ و شایسته‌ داراییه‌كانی سه‌رجه‌م چین و توێژه‌كانی خه‌ڵكی كوردستان به‌ توێژی خوێندكاران و قوتابیانیشه‌وه‌. 
كۆبوونه‌وه‌كه‌ هه‌ڵوه‌سته‌ی له‌سه‌ر مه‌ترسی ئه‌منی و سه‌ربازی تێهه‌ڵچوونه‌وه‌ی رێكخراوی تیرۆرستی داعش له‌ كه‌ركوك و ناوچه‌ دابڕێنراوه‌كان كرد، له‌م بواره‌دا به‌ پێویست زانرا هه‌ماهه‌نگی و پێكه‌وه‌یی هه‌ردوولا هه‌بێت وه‌ك به‌شێك له‌ رووبه‌ڕووبونه‌وه‌ی ئه‌و مه‌ترسیانه‌ی له‌ سه‌ر خاك و خه‌ڵكی كوردستان له‌و ناوچانه‌دا هه‌یه‌، هه‌روه‌ك به‌شێكیش له‌ پێویستی دابینكردنی ژینگه‌یه‌كی باشی ته‌بایی و یه‌كڕیزی نێوان هه‌ردو،لا و هێزه‌ سیاسییه‌كانی تر به‌ره‌و په‌ره‌پێدانی په‌یوه‌ندییه‌ دوو قۆڵییه‌كان بۆ خێر و خۆشی گه‌له‌كه‌مان. له‌م باره‌یه‌شه‌وه‌ میكانیزمی پێویست بڕیاری لێوه‌درا.

PUKmedia    
ده‌قی راگه‌یه‌نراوی كۆبوونه‌وه‌ی هاوبه‌شی یه‌كێتی و پارتی له‌ ده‌باشان: