ته‌مه‌نی هه‌رزه‌كاری و به‌رپرسیارێتی دایك و باوك

قۆناغی هه‌رزه‌كاری، قۆناغێكی هه‌ستیاره‌ بۆ خێزان، دایك و باوك ده‌خاته‌ به‌رده‌م به‌رپرسیارێتییه‌كی گه‌وه‌ره‌، زۆرجار تووشی نیگه‌رانی ده‌بن، ده‌كه‌ونه‌ به‌رده‌م چه‌ندین پرسیاره‌وه‌، ئایا چۆن مامه‌ڵه‌ له‌گه‌ڵ ئه‌و قۆناغه‌دا بكه‌ن و چ ڕێگه‌یه‌ك بگرنه‌به‌ر، له‌ دوای خێزان فێرگه‌ و ستافی فێرگه‌ ده‌كه‌ونه‌ به‌رده‌م ئه‌و به‌رپرسیارێتییه‌وه‌. بۆ ئه‌م مه‌به‌سته‌ PUKmedia گفتوگۆی كرد له‌گه‌ڵ نووسه‌رو مامۆستا سه‌ردار عه‌بدول ره‌حمان.

پ/ قۆناغی هه‌رزه‌كاری قۆناغێكی سه‌ربه‌خۆ نییه‌، به‌ڵكو تاك كاریگه‌ره‌ به‌ هه‌ڵسوكه‌وتی هاوڕێ و ده‌وروبه‌ر، ڕۆڵی خێزان و فێرگه‌ چییه‌ بۆ سه‌ربه‌خۆ كردنی تاكێكی پێگه‌یشتوو؟

و/ قۆناغی هه‌رزه‌كاری قۆناغێكی هه‌ستیاره‌، تاك ده‌كه‌وێته‌ ژێر كاریگه‌ریی و هه‌ژموونی ژینگه‌ی ده‌وروبه‌ر، چونكه‌ ده‌رون و ئاره‌زوویه‌كی ناجێگیری هه‌یه‌، سه‌قامگیر نییه‌ له‌سه‌ر كایه‌ی بابه‌ت و شته‌كان.
پێویسته‌ خێزان به‌ وریاییه‌وه‌ مامه‌ڵه‌ له‌گه‌ڵ هه‌رزه‌كار بكه‌ن و پشوو درێژ بن له‌گه‌ڵی هه‌وڵبده‌ن بناغه‌ی كه‌سایه‌تی دروست بكه‌ن له‌ڕێگه‌ی پێدانی ڕێنمایی په‌روه‌رده‌یی و ڕه‌وشتی، ئاشناكردنی تاك به‌ بنه‌ما ئایینی و په‌روه‌رده‌ییه‌كان هۆكارێكی گرنگی دروستكردنی تاكی باوه‌ڕ به‌خۆبوونه‌ . كه‌سایه‌تی تاك پێویستی به‌ كات و مامه‌ڵه‌كردنی شیاو هه‌یه‌،

پ/ جیاوازی قۆناغی منداڵی و هه‌رزه‌كاری چییه‌؟
و/ده‌بێت دایك و باوك به‌ گوێره‌ی ته‌مه‌ن مامه‌ڵه‌ له‌گه‌ڵ گه‌نج بكه‌ن، گۆشی بكه‌ن به‌ ڕه‌فتاری كۆمه‌ڵایه‌تی شیاو. له‌ڕێگه‌ی پێدانی زانیاری په‌روه‌رده‌یی و ئامۆژگاری، گه‌نج نابێت بێ ئومێد بكرێت چونكه‌ بناغه‌ی كه‌سیه‌تی سه‌ركه‌وتوو له‌ قۆناغی هه‌رزه‌كارییه‌وه‌ ئیدامه‌ ده‌كرێت.
پێویسته‌ به‌ وریاییه‌و مامه‌ڵه‌و ڕه‌فتاری له‌گه‌ڵ بكرێت دوور له‌ ئازاردان، پێویست ڕێز له‌ بیروۆچوونی بگیرێت و بۆچوونه‌كانی به‌هه‌ند وه‌ربگیرێت.

پ/ به‌پێی لێكۆڵینه‌وه‌كان دایك و باوك ده‌ناڵێنن له‌گه‌ڵ ئه‌م قۆناغه‌دا، به‌ چ شێوازێك خێزان و فێرگه‌ مامه‌ڵه‌ له‌گه‌ڵ ئه‌م قۆناغه‌دا بكه‌ن؟

و/گه‌نج ئێستا گرفته‌كه‌ی له‌وه‌ دایه‌، پێشكه‌وتنه‌كانی سه‌رده‌م هاوشانی بیركردنه‌وه‌و خولیاكانی نییه‌، واتا په‌روه‌رده‌یه‌كی وه‌ها پێشكه‌وتووی نییه‌ كه‌ بتوانێت چۆن مامه‌ڵه‌ له‌گه‌ڵ به‌ركه‌وته‌ كۆمه‌ڵایه‌تییه‌كان و گۆڕانی ژینگه‌ی كۆمه‌ڵایه‌تی بكات، هه‌میشه‌ بۆچوونه‌كانی خۆی پێ دروستره‌ له‌ناو كۆمه‌ڵگادا، بۆیه‌ په‌روه‌رده‌كردنی تاكی هه‌رزه‌كار كاری خێزان و خوێندنگاو دامه‌زراوه‌ ئاینی و كلتووری و فه‌رهه‌نگییه‌كانه‌، چونكه‌ ئه‌قڵی دروست له‌ ژینگه‌یه‌كی دروسته‌وه‌ سه‌رچاوه‌ ده‌گرێت.

PUKmedia ئا / چنار عه‌زیز