سەنتەری هاوكاریكردنی رزگاربووانی توندوتیژی دەكرێتەوە

سندوقی نیشتەجێبوونی سەر بەنەتەوە یەكگرتووەكان لەگەڵ وەزارەتەكانی تەندروستی و كارو كاروباری كۆمەڵایەتی بەپشتیوانی ئاژانسی هاوكاری نێودەوڵەتی كۆریا(KOICA) لەم مانگەدا سەنتەرێكیان لەشاری كەركوك بۆ هاوكاریكردنی هەمەلایەنەی ئەو ژن و كچە رزگاربووانە كردەوە كە لەسەر كێشەی كۆمەڵایەتی توندوتیژییان بەرامبەر ئەنجامدراوە. 

بەگوێرەی بەیاننامەیەك كەئەمڕۆ دووشەممە لەلایەن یۆنامییەوە بڵاوكراوەتەوەو وێنەیەكی دەست PUKmedia كەوتووە هاتووشە: سەنتەرێكیان لەناو ناوەندی سەرپەرشتی خزمەتگوزارییە تەندروستییە سەرەتاییەكان كردەوە بەمەبەستی یەكخستنی سەرجەم خزمەتگوزارییەكان و پێشكەشكردنی خزمەتگوزاری هەمەلایەنە بەو ژن وكچانەی رزگاركراون كە لەسەر كێشە كۆمەڵایەتییەكان توندوتیژییان لەبەرامبەردا كراوە. 

لەو بارەیەوە، چو هیونگ لی بەڕێوەبەری لقی قەتەری ئاژانسی كۆیكای كۆری بۆ هاوكاری نێودەوڵەتی لەعیراق رایگەیاند: ئاوارەو پەنابەران و گەڕاوەكان و ئەو كۆمەڵگایەنەشی میواندارییان لێكردوون لەدۆخێكی خراپدان و بەهەلومەرجێكی یەكجار دژواردا تێدەپەڕن و دوور لەماڵ و خێزانەكانیان و لەسایەی بڵاوبوونەوەی پەتای كۆڤید-19 ژیان دەگوزەرێنن، بەهیوای ئەوەی بتوانن زاڵبن بەسەر سەرجەم ئەو ئاستەنگەكاندا كە رووبەڕوویان دەبێتەوە و ئەو ژیانەیان بۆ بێتەدی كەخەونی پێوە دەبینن و ئەو خزمەتگوزارییانەش پێشكەشی ئەم سەنتەرەبكەن كە پێویستییان پێیەتی.

هەروەها راشیگەیاند: دوو سەنتەری نموونەیی دیكە بۆ رێكخستنی خێزانیی لەهەولێرو كەركوك كراونەتەوە كە لەلایەن وەزارەتی تەندروستی و ژینگەی فیدڕاڵ و وەزارەتی تەندروستی حكومەتی هەرێمی كوردستان و سندوقی نیشتەجێبوونی سەر بەنەتەوە یەكگرتووەكان و بەپشتیوانی وڵاتی سویدو بەریتانیا ئەنجام دراون و بەنیازیشن لەكۆتایی ئەمساڵ 2021دا سێ‌ سەنتەری دیكە لەپارێزگاكانی دهۆك و سلێمانی و بەسڕە بكەنەوە.

سندوقی نیشتەجێبوونی سەر بە نەتەوە یەكگرتووەكان لەساڵی 2022دا پێنج سەنتەری دیكە بەپاڵپشتی گەلی بەریتانیا لەبواری رێكخستنی خێزانیدا دەكاتەوە كەلەگەڵ ستراتیژییەتی نیشتمانیدا بگونجێت و تێیدا حاڵەتەكانی لەدایكبوون و رێكخستنی خێزان لەیەكتری دووربخرێنەوە.

هەر سەبارەت بەم دەستپێشخەرییانەش، مارك برایسۆن ریتشاردسۆن باڵوێزی بەریتانیا لەعیراق رایگەیاند: شانشینی یەكگرتوو تەواوكار دەبێت لە پشتیوانی جێبەجێكردنی ستراتیژییەتی رێكخستنی خێزان لەعیراق و دیدگای كۆمەڵگە لۆكاڵییەكان بەتایبەتیش كچان و ژنان و دەستگەیشتن بەخزمەتگوزارییەكی تەندروستی شیاوو باش.

لای خۆشیەوە د.ریتا كۆلۆمبیا نوێنەری سندوقی نیشتەجێبوونی سەر بەنەتەوە یەكگرتووەكان رایگەیاند: ژنان وكچانی عیراق مافی ئەوەیان هەیە پارێزگارییان لێبكرێت و دەستیان بگات بەخزمەتگوزارییە تەندروستییەكان و ئەم سەنتەرانەی خێزان و ژنان و كچان ئەو زانیاری و خزمەتگوزارییە تەندروستییانە فەراهەم دەكات كە ئەوان پێویستییانە، لەنێویاندا ئەو خزمەتگوزارییانەی تێدایە كەپەیوەستن بەبواری تەندروستی ژنانی دوو گیان و منداڵبوون، هەروەها چۆنێتی خۆپارێزی لەو توندتیژییەی لەسەر كێشە كۆمەڵایەتییەكان لەئارادایە. 

PUKmedia راگەیاندنی یۆنامی