وەزیری پەروەردە: داوای لێبوردن ناكەم

وەزیری پەروەردەی حكومەتی هەرێمی كوردستان ڕایگەیاند لەچەند ڕۆژی داهاتوودا نەوت بەسەر قوتابخانە و خوێندنگەكاندا دابەشدەكرێت و بڕی یەك ملیار و 500 ملیۆن دینار پێداویستی بۆ خوێندنگە و قوتابخانەكان دابینكراوە.

د. ئالان محەمەد سەعید وەزیری پەروەردەی حكومەتی هەرێمی كوردستان لە كۆنفرانسێكی ڕۆژنامەوانیدا ڕایگەیاند: لە مانگی سێی ئەمساڵدا بڕیارماندا پێداچوونەوە بە هەموو پرۆگرامەكانی خوێندن بكەین و زیاتر لە 1300 ناونیشانمان لەناو وەزارەتی پەروەردەدا هەیە، لە باخچەی منداڵانەوە هەمانە هەتا پۆلی 12 ئامادەیی بەهەموو بەشەكانییەوە و پێداچوونەوە بە پرۆگرامەكانی خوێندن پێویستی بە پۆلێن بەندی و كاری زانستی دەوێت. سەبارەت بەپێدانی ڤاكسین بۆ مامۆستایان وتیشی: پێدانی ڤاكسین بۆ مامۆستایان قۆناغی باشی بڕیوە و بەپێی دوایین داتا نزیكەی 80 هەزار مامۆستا ژەمی یەكەم و دووەمیان وەرگرتووە.

وتیشی: بە پێی بڕیارەكانی ئەنجومەنی وەزیران تا 1-1-2022 سەرجەم فەرمانبەران و بۆ مامۆستایانیش تا 1-12-2021 دەبێت ڤاكسین وەربگرن. ئەوانەی كە ڤاكسینیان بەكارنەهێنابێت ئاگادار دەكرێنەوە. لەبارەی كەموكورتییەكانی ناو خوێندنگەكانیش وتیشی:بڕی یەك ملیار و 500 ملیۆن دینار پێداویستی بۆ قوتابخانە و خوێندنگەكان كڕاوە و زیاتر لە 80 هەزار زۆپامان لەناو ناوەندەكانی خوێندندا هەیە. سەبارەت بە هەڵەیەك لە یەكێك لە كتێبە كوردییەكان وتی: من نە وەك وەزیری پەروەردە و نە وەك سیفەتی شەخسی ئەو كارەم نەكردووە، ئیتر داوای لێبوردن لەكێ بكەم، كاتێك كە من شتێكم نەكردبێت داوای لێبوردن لە كێ بكەم. پێشتر شتێك كراوە هەڵەبووە و من هاتووم چاكی بكەم ئیدی داوای لێبوردن لەكێ بكەم. كارێك من بڕیارم لەسەری نەدابێت داوای لێبوردن ناكەم.

PUKmedia تایبەت