کوردستان و بزافى نەتەوەیى کوردى سەرۆک مام جەلال

ئەمڕۆ ٨ى ١٢ى ٢٠٢١، لە هۆڵى خاک لە مەراسیمێکدا، کتێبی کوردستان و بزافی نەتەوەیی کورد لەنووسینی سەرۆک مام جەلال بە زمانى کوردى بڵاوکرایەوە، کە لەسەر ئەرکی خاتوو شاناز ئیبراهیم ئەحمەد بەچاپ گەیەنراوە.

لەو مەراسیمەدا، خالید مەجید فەرەج کە کتێبەکەى لەزمانی عەرەبییەوە وەرگێڕاوەتە سەر زمانی کوردی، پوختەیەکى لەبارەى کتێبەکەوە بۆ ئامادەبووان باسکرد.

هەر لەو مەراسیمەدا، چەپکە گوڵى سوپاس و پێزانینى خاتوو هێرۆ ئیبراهیم ئەحمەد پێشکەشى وەرگێڕى کتێبەکەى سەرۆک مام جەلال کرا.

دواتریش، لەلایەن دکتۆر محەمەد سابیر چەند زانیارییەکى وورد لەبارەى کتێبەکە و خەباتى سەرۆک مام جەلال کرا.

سەرۆک مام جەلال جگەلەوەى یەکێکە لە سەرکردە سیاسى و دیبلۆماسى و رۆژنامەنووس و پارێزەرە دیارەکان، نووسەرێکى دیاریشە و بەشێوەیەکى کاریگەر بەشدارى لە تیشک خستنەسەر تێکڕاى بزوتنەوەى سیاسى عێراق و ناوچەکە و بزوتنەوەى سیاسى کوردى کردوە، لەم بوارەشدا چەندین کتێبى لەسەردەمى جیا جیادا نووسیوە، کە کتێبخانەى کوردى و عەرەبى دەوڵەمەند کردوە و بوونەتە سەرچاوەیەکى گرنگ بۆ لێکۆڵینەوە لەبوارى مێژووى جوڵانەوەى سیاسى کوردى و عێراقیدا.

لە پێشەکی کتێبى(کوردستان و بزافی نەتەوەیی کورد)دا هاتووە: مام نموونەى هەمیشە زیندوى ئەو رۆشنبیرەیە لەناو بزوتنەوەى رزگاریخوازى نەتەوەییماندا کە ئەم بەرهەمە ناوازەیەى لەبوارى فیکرى سیاسیدا بۆ ئێمە بەجێ هێشتووە، ئەو سیاسییەکى بیرمەند بوو بۆیە سادە بوو بەڵام پڕبوو، ئەو دەیزانى نە کۆمەڵگە و نەحیزبى سیاسیش بەبێ رۆشنبیر مەحاڵە بتوانن خۆیان نوێبکەنەوە.

PUKmedia