دەنگۆی داخستنی خوێندنگاكان رەتدەكرێتەوە

لەگەڵ بڵاوبوونەوەی دەنگۆی داخستنی خوێندگاكان بە هۆی ڤایرۆسی كۆرۆناوە، سەرپەرشتیارێكی پەروەدەیی رەتیدەكاتەوە هیچ بڕیارێكی لەو جۆرە لەكاتی ئێستا بدرێت و پێیوایە داخستنی دەوامی خوێندنگاكان  دوا رێكارەكانی خۆپارێزی دەبێت.

عیسا حسێن سەپەرشتیاری پەروەردەیی لەشاری هەولێر بە PUKmedia ی راگەیاند: بارودۆخی ئێستای تەندروستی و ئەو ئامارانەی لایەنی پەیوەندار. لەبارەی رێژەی توشبوون بە ڤایرۆسی كۆرۆنا بەو شێوەیە نییە بڕیار لەسەر داخستنی خوێندنگاكان بدرێت، بۆیە ئەو دەنگۆیە دوورە لەراستی و لەكاتی ئێستا خوێندن بەردەوام دەبێت.

راشیگەیاند: داخستنی خوێندنگاكان بڕیارتكی ئاسان نییە و بابەتێكی هەستیارە، چونكە لەماوەی دوو ساڵی رابردوودا  بەهۆی رێكارەكانی خۆپارێزی و نەبوونی دەوام،  پەروەردە و خوێندن زیانی زۆری بەركەوت و ئاستی زانستی دابەزی.

پێشیوابوو: هەر بەهۆی پێویستی بەردەوامبوونی خوێندن  و قەرەبووكردنەوەی ساڵانی رابردوو، بڕیاری داخستن و راگرتنی دەوام دوا رێكارەكانی خۆپارێزی دەبێت، بۆیەپێش ئەو هەنگاوە و لەحاڵەتی زیادبوونی رێژەی توشبوون بە ڤایرۆسی كۆرۆنا، كار بۆ توندكردنی رێكاتەكانی وەك توندكردنی بڕیاری ماسك و وەرگرتنی ڤاكسین دەكرێت.

سەرپەرشتیارەكەی پەروەدەیی ئەوەشی خستەروو: ئاساییە بەشێك لە كۆمەڵگاو ئەوانەی حەز بە بەردەوامی خوێندن ناكەن، دەنگۆی داخستنی خوێندنگاكان بڵاوبكەنەوە و لە رێگای شۆسیالمیدیاوە خەڵكی توشی دڵەراوكێ بكەن، بۆیە وەك ئاماژەمبۆكرد لەكاتی ئێستا هیچ ئامادەكارییەك بۆ  داخستنی دەوامی خوێندن لە ئارادانییە.

PUKmedia تەها عەبدوڵڵا