به‌رهه‌مه‌كانی خاتوو گه‌لاوێژ پڕفروشترین كتێب بوون

دكتۆر ژینۆ عه‌بدولڵا، له‌ وێب سایتی galawezh.com ، ئاماژه‌ی به‌وه‌دا، له‌سه‌ر داوای ناوه‌ندی ڕۆشنبیری ڕه‌هه‌ند، ته‌نها 10 ناونیشان له‌ به‌رهه‌مه‌كانی خاتوو گه‌لاوێژ، له‌ بیره‌وه‌ری و ڕۆمان و كورته‌ چیرۆك و ئه‌ده‌بی منداڵان، به‌ ڕێژه‌یه‌كی دیاریكراو خرایه‌ به‌رده‌ستی خوێنه‌ران، به‌ڵام له‌ گه‌ڵ ته‌واووبونی كۆتا ڕۆژی پێشانگای نێوده‌وڵه‌تی سلێمانی بۆ كتێب، ته‌واوی به‌رهه‌مه‌كان له‌ لایه‌ن خوێنه‌رانه‌وه‌ پێشوازییه‌كی گه‌رمی لێكراو  هیچ نووسخه‌یه‌كی به‌رهه‌مه‌كان نه‌ماوه‌و هه‌ر هه‌مووی له‌لایه‌ن خوێنه‌ران و خوێندكاران و ئه‌دیبانه‌وه‌ كڕاون.
دكتۆر ژینۆ عه‌بدولڵا، ئاماژه‌ی به‌وه‌دا به‌رهه‌مه‌كانی خاتوو گه‌لاوێژ چ وه‌ك بیره‌وه‌رییه‌كانی و چ وه‌ك یه‌كه‌مین ژنه‌ ڕۆمانووس، به‌ هۆی ئه‌وه‌ی به‌رهه‌مه‌كانی گوزارشتن له‌ واقعی كۆمه‌ڵگه‌ی كوردی و باسكردنی مێژووی نه‌ته‌وه‌كه‌مان و نه‌به‌ردی و قوربانی  ڕۆله‌كانی گه‌لی كوردوئاشناكردنی خوێنه‌ران به‌شیوازێكی جوانی به‌رزی ئه‌ده‌بی و به‌زمانێكی ڕه‌وان و بێ گرێ و گۆڵ، بۆیه‌ پێشوازییوكی زۆری لێده‌كرێت و هه‌ر یه‌ك به‌رهه‌میان خوێندنه‌وه‌ دواتر به‌رهه‌مه‌كانی تر ده‌ خوێننه‌وه‌.
لای خۆشیه‌وه‌ ئارام سدیق له‌ ناوه‌ندی ڕۆشنبیری ڕه‌هه‌ند ئاماژه‌ی به‌ودا كتێبی بیره‌وه‌رییه‌كانی خاتوو گه‌لاوێژ له‌ ڕیزی پڕفرۆشترین كتێبه‌ بیروه‌رییه‌كانی ناوه‌ندی ڕه‌هه‌ند بووه‌ و ئه‌وانه‌ی دیكه‌شی پێشوازی باشیان لێ كراوه‌.
شایه‌نی ئاماژه‌ پێكردنه‌، له‌سه‌ر ڕاسپارده‌و ڕێنمایی خاتوو گه‌لاوێژ، ته‌واوی كۆبه‌رهه‌مه‌كانی به‌ دیاری پێشكه‌شی ناوه‌نده‌ ئه‌كادیمی و كتێبخانه‌كان و ده‌زگاڕۆشنبیرییه‌كان و ڕووناكبیرییه‌كان ده‌كرێت، به‌ڵام له‌سه‌رداوای ڕێكخه‌رانی پێشانگای نێوده‌وڵه‌تی سلێمانی بۆ كتێب، نرخێكی ڕه‌مزی له‌سه‌ر به‌رهه‌مه‌كان دانرابوو، داهاته‌كه‌شی ده‌درێته‌ پڕۆژه‌ی خێرخوازی  به‌هاوكاری ڕێكخراوی مناڵپارێزی كوردستان.

PUKmedia