گردبوونەوەی جەماوەری بۆ پشتیوانی كۆچبەرانی بێلاڕوسیا بەڕێوەدەچێت

لەمیانەی كاریگەری بارودۆخی بڵاوبوونەوەی پەتای كورۆنا و پابەندبوون بەڕێنماییەكانی خۆپارێزی تەندرووستی، لە درێژەی كارو چالاكییەكانی كوردانی كەنەدا بۆ پشتیوانی پەنابەران،  بەسەرپەرشتی فیدراسیۆنی سەراسەری پەنابەرانی عیراق لەكەنەدا لە ژێر درووشمی  (ژیان و گیانی پەنابەران مەكەنە بارمتەی سیاسەت و بارمتەی نێوان خۆتان)گردبوونەوەیەكی جەماوەری لەبەردەم پارلەمانی هەرێمی ئونتاریۆ لە شاری تورۆنتۆ بەمەبەستی پشتیوانی ئەو پەنابەرانەی كە لە سنوورەكانی نێوان بێلاروسیا وپۆڵەندا گیریان خواردوەو روبەڕووی ژیانێكی سەخت و ئازارو ئەشكەنجەی پۆلیسەكان دەبنەوە بەڕێوەچوو.
هەر لەمیانەی گردبوونەوەكەدا بەشداربووان بەدروشم و خوێندنەوەی چەندین وتار لەلایەن جەلال سەعید نوێنەری فیدراسیۆن و هەروەها سەرگوڵ ئەحمەدو سەردار عەبدوڵڵاو مستەفا یونسی پێشكەشكران.
وتارەكان بەگشتی پشتیوانی و هاوسۆزی خۆیان بۆ پەنابەرانی بێلاروسیا نیشانداو داواشیان لە پەرلەمان و حكومەتی كەنەداو رایگشتی نێودەوڵەتی كرد بۆ بەهاناوەچوونی ئەو پەنابەرانە كە لە سنورەكانی نێوان هەردوو وڵاتی بێلاروسیاو پۆڵەندا گیریان خواردوەو هاوكاری هەلومەرجی نالەباری ئەو شەپۆلە لە پەنابەران كە ژمارەیەكی زۆری كوردیان تێدایە بە ڕێكخراوە مرۆڤدۆستەكانی كەنەدا و جیهان بگەیەنن.
جەلال سەعید نوێنەری فیدراسیۆن پەنابەران لەوڵاتی كەنەدا لە وتەكەیدا بەو بۆنەوە رایگەیاند: رایدەگەیەنین كە یەكێتی ئەوروپا بەرپرسیارە لە پاراستنی ژیان و چارەنووسی پەنابەران و نابێت سات و سەودا بەژیانی پەنابەرانەوە بكرێت، هەروەها لە یاداشتەكەمان بۆ پەرلەمانی كەنەدا داوامان لە حكومەتی كەنەدا كردووە بەرپرسیارێتی خۆی بەرامبەر بەو پەنابەرانە نیشان بدات و بتوانێت بەشێك لەو پەنابەرانە بەپێی سپۆنسەری تایبەتەوە لەوڵاتی كەنەدا قبوڵ بكرێن.
PUKmedia عوسمان عەلی - تورونتۆ