قوتابخانه‌یه‌ك له‌سه‌یدسادق ساڵانه‌ 2 تۆن هه‌نار ده‌فرۆشێت

له‌گوندی سه‌رای سوبحان ئاغای سه‌ر به‌قه‌زای سه‌یدسادق خوێندگه‌ی شه‌ممی بنه‌ڕه‌تی، ساڵانه‌ 2 تۆن هه‌نار به‌رهه‌مده‌هێنێت، هه‌روه‌ها به‌ڕێوه‌به‌ری خوێندنگه‌كه‌ش باس له‌وه‌ ده‌كات ده‌یه‌وێت پڕۆژه‌كه‌ زیاتر گه‌وره‌ بكات له‌ ساڵانی داهاتوودا.

كۆچه‌ر له‌ تیف به‌ڕێوه‌به‌ری قوتابخانه‌ی شه‌ممی بنه‌ڕه‌تی به‌ PUKmedia ی ڕاگه‌یاند: ئامانجمان بووه‌ به‌شێوه‌یه‌كی كرداری وانه‌ی دڵسۆزی و خۆشه‌ویستی بۆ قوتابخانه‌و ژینگه‌  قوتابیه‌كانمان بڵێینه‌وه‌، كاریگه‌ریمان ھه‌بێت بۆ سه‌ر قوتابخانه‌و خوێندنگاكانی تریش، به‌دڵنیایی ھه‌تا خوێندكارت زۆرتربێت زیاتر ده‌توانین كار بكه‌ین له‌ ژینگه‌ی قوتابخانه‌ وسوود له‌ توانای جه‌سته‌یی قوتابیان و ھاوكاری  بینیین.

ئاماژه‌ی به‌وه‌شكرد: زیاتر له‌ 16 ساڵه‌ خزمه‌تی  ئه‌م باخی هه‌ناره‌ ده‌كه‌م كه‌ زیاتر له‌ 300 داری هه‌ناری تێدایه‌، چه‌ندین به‌روبوومی داری دیكه‌ی تری تێدایه‌،  وه‌ك  قه‌یسی قۆخ، زه‌یتون پرته‌قاڵ، جگه‌ له‌به‌رهه‌می هه‌نار ئه‌مانه‌شی تێدایه‌.

ئه‌وه‌شی خسته‌ڕوو: له‌سه‌دا 80 %قوتابخانه‌ كه‌ ڕێژه‌ی سه‌وزای پێكدێت ، ڕۆژانی پشویش مامۆستایان كارگوزارن خزمه‌ت سه‌وزای باخی قوتابخانه‌كه‌ ده‌كه‌ن.

وتیشی: ساڵانه‌ به‌رهه‌می قوتابخانه‌ كۆده‌كرێته‌وه‌ ، كه‌م كورتی و پێداویستی قوتابخانه‌كه‌ی پێ دابین ده‌كرێت، داهاتی  به‌رهه‌می هه‌ناری قوتابخانه‌كه‌ سێ هینده‌ی  ئه‌و نه‌سرییه‌ بۆ دابین كراوه‌ .

به‌ڕێوه‌به‌ری ئه‌و خوێندگه‌یه‌ وتیشی: هۆكاری دروستبوونی ئه‌م باخه‌ ده‌گه‌ڕێته‌وه‌ بۆ بوونی زۆر مامۆستای لێبورده‌و باش كه‌ له‌ ڕۆژانی پشویش دێنه‌وه‌ قوتابخانه‌كه‌ خزمه‌تی باخه‌كه‌وقوتابخانه‌كه‌ ئه‌كه‌ن .

ئه‌وه‌شی خسته‌ڕوو: باخچه‌كه‌ نزیكه‌ی 3 ساڵه‌ قازانجی دارایی له‌سه‌ر قوتابخانه‌كه‌  ده‌كات، به‌فرۆشتنی به‌رهه‌می هه‌نار .

جێ ئاماژه‌یه‌: قوتابخانه‌ی شه‌ممی بنه‌ڕه‌تی له‌ 2 دۆنم زه‌وی پێكهاتووه‌، به‌رهه‌می ئه‌مساڵی هه‌ناری له‌چاو ساڵی پار بۆ دوو هێنده‌ زیادی كردووه‌.

PUKmedia محه‌مه‌د عه‌بدولره‌حمان/  شاره‌زوور