ئاسۆ مامەند: یەكێتی ژنان جێی شانازی نەتەوەكەمانە

بە بۆنەی یادی 32 ساڵەی دامەزراندنی یەكێتی ژنانی كوردستانەوە، ئاسۆ مامەند سەرپەرشتیاری كەركوك-سەڵاحەدینی یەكێتیی نیشتمانیی كوردستان پەیامێكی پیرۆزبایی ئاڕاستەی لێپرسراو و ئەندامانی لقی كەركوكی یەكێتی ژنانی كوردستان دەكات و رایدەگەیەنێت، یەكێتیی ژنان چاونەترسانە خەباتی بێوچانی دەستپێكرد و بووەتە جێی شانازی نەتەوەكەمان.

دەقی پەیامەكە:
بەڕێزان/ لێپرسراو و ئەندامانی لقی كەركوكی یەكێتی ژنانی كوردستان

بە بۆنەی یادی (32) ساڵەی دامەزراندنی یەكێتی ژنانی كوردستانەوە، گەرمترین پیرۆزبایی خۆم ئاراستەی لێپرسراو و ئەندامانی لقی كەركوكی یەكێتیی ژنانی كوردستان و تەواوی ئەندامانی رێكخراوە تێكۆشەرەكەتان دەكەم.

یەكێتی ژنانی كوردستان، له قۆناغێكی مێژوویی و هەستیاری گەلەكەمان و لە ژێر سایە و دیدگای یەكێتیی نیشتمانیی كوردستان وەك پێویستییەكی هەنووكەیی خەباتی ئەوێ رۆژێی گەلەكەمان دامەزرا و بووە دەستە خوشكی رێكخراوەكانی دیكەی كوردستان.

لە تەمەنی خۆیدا یەكێتیی ژنانی كوردستان كۆمەڵێك دەستپێشخەری و دەستكەوتی گرینگی بۆ ژنانی كوردستان بەدەستهێناوە و بووەتە جێی شانازیی نەتەوەكەمان و بەپێی قۆناغ و هەلومەرجەكان چاونەترسانە و دوور لە كۆت و بەندی دواكەوتوویی، خەباتی بێوچانی دەست پێكرد لە پێناو چەسپاندنی مافە رەواكانی ژنان.

هەر لەو سۆنگەیەوە رەوانشاد سەرۆك مام جەلال رۆڵی دیار و بەرچاوی هەبوو لە داكۆكیكردن و بەدەستهێنانی مافەكانی ژنان و لەو چوارچێوەیەدا هەوڵی زۆریدا بۆ ئەوەی بە یاسا و دەستوور خواست و مافەكانی ژنان بەدی بهێنرێ و چیتر داب و نەریتی دواكەوتووانە، نەبنە رێگر لە بەردەم توانا و بەهرەكانیان.

دووبارە یادی دامەزراندنی یەكێتیی ژنانی كوردستان لە تەواوی ژنانی كوردستان و كەركوك پیرۆز بێت

ئاسۆ مامەند سەرپەرشتیاری كەركوك-سەڵاحەدینی یەكێتیی نیشتمانیی كوردستان

PUKmedia تایبەت