كتێبی كوشتنی ژنان بە بیانووی شەرەف بڵاو دەكرێتەوە

ڕۆژی چوارشەممە 27-10-2021 سەعات 3:30 خولەكی پاشنیوەڕۆ لە باخچەی ڕێكخراوی گەشەپێدانی مەدەنیەت لە سلێمانی مەراسیمی ناساندن و بڵاوكردنەوەی كتێبی كوشتنی ژنان بە بیانووی شەرەف بەڕێوەدەچێت. 

لەوبارەیەوە د. نەوزاد ئەحمەد ئەسوەد نووسەر و ئامادەكاری كتێبەكە لەلێدوانێكی تایبەتدا بۆ PUKmedia ڕایگەیاند: كتێبی كوشتنی ژنان بە بیانووی شەرەف بریتیە لە پێنج چیرۆكی ڕاستەقینەی ژنان لە هەرێمی كوردستان كە بە بیانووی شەرەف لەلایەن كەسوكاریانەوە كوژراون و كتێبەكە بە هاوبەشی لەگەڵ ڕێكخراوی گەشەپێدانی مەدەنیەت(CDO)  بە پاڵپشتی دارایی وەزارەتی دەرەوەی ئەڵمانیا و پشتگیری تەكنیكی كونسۆڵیەی ئەڵمانیا لە هەرێمی كوردستان چاپ كراوە و بیرۆكەكەشی هی ڕێكخراوی گەشەپێدانی مەدەنییەتە.

 د. نەوزاد ئەحمەد ئەسوەد سەبارەت بە هەڵبژاردنی ئەو پێنج چیرۆكە، وتیشی: ئەو پێنج چیرۆكە دیكۆمێنتارییە و لەڕاستیدا چیرۆك نین بەڵكوو كۆمەڵێك ڕووداوی ڕاستەقینەیە كە لە ناوچە جیاجیاكانی كوردستان ڕوویانداوە و لەسەر شێوازی چیرۆك داڕێژراوە و دەتوانین بڵێین چیرۆك توێژینەوەن، یانی هەم چیرۆكن و هەم توێژینەوەن و سوود لە تەكنیكەكانی چیرۆك و گێڕانەوە وەرگیراوە.

نووسەر و ئامادەكاری كتێبەكە ئاماژەی بەوەشكرد:چیرۆكەكان باس لە كوشتنی پێنج ژن دەكەن كە لە ناوچە جیاجیاكانی هەرێمی كوردستان بە دەستی كەسوكارە نزیكەكانی خۆیان بە بیانووی شەرەف كوژراون و چیرۆكەكان بەپێی دیكۆمێنێت و بە پشتبەستن بەلێكۆڵینەوەكانی پۆلیس و دادگان دارێژراون و تێكەڵی خەیاڵ كراون.

PUKmedia تایبەت