داوای کاتی زیاتر بۆ دەوامی خوێندنگاکان دەکرێت

وەک لێپسراوانی هەرێم ئاماژەی بۆ دەکەن بڕیارە سبەی دووشەممە لیژنەی باڵای بەرەنگاربونەوەی ڤایرۆسی کۆڕۆنا  کۆبێتەوە، بەشێکی کۆبونەوەکە تایبەت دەبێت بە دەوامی خوێندنگاکان و هەڵسەنگاندن بۆ رەوشی تەندروستی لە ناوەندەکانی خوێندن، لەو بارەیەوە سەرۆکی یەکێتی مامۆستایان بەدووریزانی هیچ بڕیارێک لەبارەی داخستن یان کەمکردنەوەی دەوامی خوێندن بدرێت، پێشیوابوو ئەمساڵ پەروەردە پێویستی بەکاتی زیاتر هەیە ، نەوەک کەمکردنەوەی رۆژەکانی دەوام.

عەبدولواحید مەحەمەد سەرۆکی یەکێتی مامۆستایانی کوردستان بە PUKmedia ی راگەیاند: بەدووری دەزانین لە کۆبونەوەی سبەی لیژنەی باڵای بەرەنگاربونەوەی کۆڕۆنا بڕیار لەسەر داخستن یان کەمکردنەوەی دەوامی خوێندن بدرێت، بەڵکو چاوەڕانی توندکردنی رێکارەکانی خۆپارێزی و وەرگرتنی ڤاکسین دەکرێت.

ئاماژەی بەوەشکرد:  بەهۆی ئەوەی لەدوو ساڵی رابردوو وەکو پێویست دەوام نەکراوە و خوێندکاران لەوانەکانیان دواکەوتوون، بۆیە ئێستا پەروەردە زۆر پێویستی بەکات هەیە، تاکو جگە لە تەواوکردنی مەنهەجی خوێندنی ئەمساڵ، قەرەبووی بەشێک لە خوێندنی ساڵی رابردووش بکاتەوە.

وتیشی؛ راستە رێژەی بڵاوبونەوەی  کۆڕۆنا زیادیکردوە ، بەڵام بەو شێوەیە نیە بڕیاری داخستنی خوێندنگا یان قەدەغەی هاتوچۆ. بدرێت، چونکە لەکاتی رێوشوێنی دیکە هەیە بۆ ئەوەی ژیان نەوەستێت و مرۆڤ خۆی لەگەڵ بارودۆخەکە رابێنێ، هەروەک چۆن  لە زۆربەی وڵاتانی جیهان پەیڕەو دەکرێ.


PUKmedia تەها عەبدوڵڵا