سەلام لە جاکی شان بکەن !

لە هەموو وڵاتانی جیهانی پێشکەوتوو و دواکەوتوو، دانانی خاڵی پشکنینی لە ناکاو، و هەرجارەی لە شوێنێک (نەک وەکو ئەوانەی ئێمە، کە وەکو دەوامی دائیرە، هەموو رۆژێ لە هەمان کات و لە هەمان شوێن خاڵی پشکنینی- بێ سوود- دادەمەزرێنن ) پرۆسێسێکی کاریگەرە بۆ دەستگیرکردنی تاوانباران و هەڵاتوان لەدەستی دادوەری و دەرچوان لە رەوتی یاسا، و ئەو کەسانەش کە ئەم خاڵانە دادەنێنەوە، دەبێ کەسانێکی پسپۆر وشارەزا بن لە کارەکەیان و هەر کە سەروبچمی تاوانبارێک ببینن، یەکسەر شک و گومانی لێبکەن، و لێپرسینەوەی لەگەڵدا بکەن، و پرسیاری وای لێبکەن، کە کابرای تاوانبار بشێوێ و بشڵەژێ، ئەوکات گومانەکەیان لێ پتەوتر دەبێ، و مافی ئەوەیان دەبێ کە کابرا دەستگیر بکەن، و نەهێڵن توانای ئەوەی هەبێ دەربازبێ، و دەبێ ئەو کەسانەی لەو خاڵانە دەوەستن، هەردەم لە ئامادەباشی دابن، نەوەک تاوانبارێک هەر کە ئەم خاڵە ببینێ، هەوڵ بدات بەخێرایی بۆی دەربچێ، و ئەو کەسانەی کە لە خاڵەکە وەستاون، هەر پێڕانەگەن چەکەکانیان لە شان بێننە خوارەوە!.

سەردەمانێک برادەرێک لەگەڵ هێزەکانی کۆریای باشوور لە کوردستاندا کاری دەکرد، بۆخۆی لەگەڵ شوفێرێک و دوو کارمەندی کۆریایی بە کارێکی دیاریکراو بە شەقامەکانی شاری هەولێردا گوزەر دەکەن بۆ شوێنێکی دیارکراو، و ئەو برایە دەیزانی کە لە شوێنی دیاریکراو هەروەکو جاران خاڵێکی پشکنینی خۆمانەی لێیە، و هەر لەدوورەوە خێرایی مۆنیکاکەیان کەمکردەوە، و تا گەیشتنە ئەو پۆلیسانەی کە لە خاڵەکە وەستابوون، برادەرەکە پێشبینی ئەوەی دەکرد، کە زۆر پرسیاریان لێبکرێ، سەبارەت بەو میوانە کۆریایانە، ئایا بۆکوێیان دەبەن، و ئێوە کێن، و ناسنامەکانتان نیشان بدەن، و چەندین پرسیاری تری لەو بابەتە، بەڵام ئەوەی هەرگیز کە ئەو برایە بیری لێندەکردەوە (هەروەکو بۆی گێڕامەوە)، ئەوەبوو هەر کە گەیشتنە خاڵەکە، یەکێ لە پۆلیسەکان، سەری هێنایە ژوورەوە، و سەیرێکی کۆریاییەکانی کرد، و پێیگووتن: سەلام لە جاکی شان بکەن!!.

کاتێ کە ئەو برایە ئەو قسەیەی بۆ کۆریاییەکان گێڕایەوە، کۆریاییەکان دایانە قاقای پێکەنین و ووتیان: ئێوە تا ئێستا نازانن کە ئێمە کۆریایی باشوورین، نەک خەڵکی هۆنگ کۆنگ (چونکە جاکی چان خەڵکی هۆنگ کۆنگە )؟!. سەلام هەر لەخۆت بێ کاکی پۆلیس!!.

هەندرێن خۆشناو