یەكێتی مامۆستایان: پرۆسەی خوێندن بەكەموكوڕییەوە دەستپێدەكات

سەرۆكی لقی هەولێر یەكێتی مامۆستایانی رایدەگەیەنێت: كردنەوەی دەوامی خوێندنی ئەمساڵ پێویستی بەئامادەكاری تەواو هەیە، ئاماژەی بەوەشكرد چەندین ئاستەنگ و بەربەست لەبەردەم پڕۆسەی خوێندن هەیە، دەبوو سەرەتا كار بۆ چارەسەركردنیان بكرێت.

عیسا حسێن سەرۆكی لقی هەولێری یەكێتی مامۆستایانی كوردستان بە  PUKmediaی راگەیاند: دەستپێكردنی ساڵی نوێی خوێندن لەكاتێكدایە  چەندین گرفت و بەربەست لەبەردەم پرۆسەی خوێندن ماوە، بۆیە پێویستبوو هاوشێوەی ناوچەكانی دیكەی عیراق پرۆسەكە بكەوێتە دوای هەڵبژاردنی پەرلەمان عیراق.

وتیشی:لەكاتی ئێستا جگە لەوەی كەشوهەوا گەرمەو  باڵەخانەكانی خوێندن وەك پێویست فێنككەرەوەی نیە، هاوكات بەشێك لەمامۆستایان و ناوەندەكانی خوێندن بەئامادەكارییەكانی هەڵبژاردن خەریكن، بۆیە دەستپێكردنی پرۆسەی خوێندن پێویستی بە ئامادەكاری زیاتر هەیە .

سەرۆكی لقی هەولێری یەكێتی مامۆستایانی كوردستان  راشیگەیاند: جگە لەو كێشانە تا ئێستا بەشێك لە تاقیكردنەوەكانی  12ی ئامادەیی تەواو نەبووە، هەروەها  مەترسیەكانی كۆرۆناش بەو شێوەیە كەمنەبووە كە ترسی نەبێت، ئەمانە هەموی وایكردەوە ئەگەر سبەی دەوامیش بكرێتەوە، كێشە و كەموڕییەكان سەرهەڵدەدات.

PUKmedia  تەها عەبدوڵڵا – هەولێر