}

پلە بەرزكردنەوەو سەرمووچەی فەرمانبەران دەستپێدەكاتەوە

عیراق 10:34 AM - 2021-09-04

پەروەردەی عیراق رایگەیاند: ئامادەكاری دەكرێت بۆ پێدانی شایستەی دارایی زیاتر لە 6 هەزار فەرمانبەرانی سەر بەوەزارەتەكەیان كە پلە بەرزكردنەوەو سەرمووچەی ساڵانەیان بۆ كراوە. لەهەرێمی كوردستانیش لە 2016ەوە پلە بەرزكردنەوەی فەرمانبەران وەستێنراوەو تائێستاش كاتی دەستپێكردنەوەی نادیارە. 

فەلاح قەیسی بریكاری وەزارەتی پەروەردەی عیراق رایگەیاند: بەڕێوەبەرایەتی گشتی كەرخ ئامادەكاری دەكات بۆ پێدانی شایستە داراییەكانی پلە بەرزركردنەو سەرمووچەی ساڵانەی فەرمانبەران.

دەشڵێت: بەپێی رێنماییەكان و یاسای وەزارەتی كە تایبەتە بە پلە بەرزكردنەوەو سەرمووچەی ساڵانە، زیاتر لە 6 هەزار فەرمانبەر لەو ئامادەكارییەی بەڕێوەبەرایەتی گشتی كەرخ سودمەند دەبن.

بریكاری وەزارەتی پەروەردەی عیراق ئاشكرایكردوە: زیاتر لە ملیارێك دینار وەك سەرمووچە بۆ فەرمانبەران دەگەڕێنرێتەوە كە پێشتر شایستیە پێدانی بوون، هەرچەندە وڵات بەقەیرانێكی دارایدا تێدەپەڕێت، بەڵام بەڕێوەبەرایەتیەكە سورە لەسەر ئەوەی پاڵپشتی تەواوی فەرمانبەران بكات كە مافەكانی پێدربێت و شایستەی خۆیان وەبگرن.

ئەوەشی وتوە: سەرجەم ئەو فەرمانبەرانەی تائێستا سەرمووچەیان بۆ خەرجنەكراوە شایستەكانیان پارێزراوەو دوای دەرچوونی بڕیار بۆیان دەگەڕێنرێتەوە، جگە لەوەش وەزارەتەكەیان ئامادەكاری دەكات بۆ خەرجكردنی پارەی چاودێری تایبەت بەتاقیكردنەوەكانی ناوەندی بۆ خوێندنی 2020 -2021 و چاوەڕوان دەكرێت هەفتەی داهاتوو پارەكە بگاتە بەڕێوەبەرایەتییەكان. 

سەرەڕاوی ئەوەی لەعیراق قەیرانی دارایی هەیە پلە بەرزكردنەوەو سەرمووچەی ساڵانەی فەرمانبەران كە بەپێی یاسا مافی خۆیانە بەردەوامە، بەڵام لەهەرێمی كوردستان لە سەرەتای ساڵی 2016ەوە پلە بەرزكردنەوەی فەرمانبەران وەستێنراوەو فەرمانبەران بێبەش بوون لەو مافیەی خۆیان كە بەپێی یاسا پێیان دراوە.

PUKmedia 

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

دابەزێنە

The News In Your Pocket