دار بەڕوویەكی 200 ساڵە بووەتە رەمزی بێستانسور

دار بەڕووە تاقانەكەی گوندی بێستانسور بووەتە جێگەی  بایەخی خەڵكی گوندەكە و ئەو كەسانەشی سەردانی دەكەن دانیشتوویەكی گوندەكەش دەڵێت، ساڵانەش 80 كیلۆ بەڕوو دەگرێت .

لەوبارەیەوە رەوەند حەمەجەزا  دانیشتووی  گوندی بێستانسور بۆ PUKmedia  دوا و وتی:  تەمەنی ئەم دارە زیاتر لە 200  ساڵە،   بەرزییەكەی 10 مەترە و  پانییەكەشی پێنج مەترە، ساڵانەش 80 كیلۆ بەڕووو دەگرێت، بەتەمەنەكانی گوندەكەش وەسێتیان كردووە  كە لەدوای نەمانی خۆیان دارەكە پارێزگاری لێ بكرێت و نەبڕرێتەوە.

هاوكات ئەحمەد قادر خەڵكی گوندی بێستانسورە و تەمەنی 64 ساڵە بۆ PUKmedia وتی:  ئەم دارە بەقەبرستان  دەورە دراوە و لە باوكمەوە بیستومە كە ناوی دارە ڕەشە و ئەوكەسەی چاندوێتی ناوی كاكە رەش بووە.

وتیشی:  دارەكە بوەتە شوناس و رەمزی گوندەكە و  ئەو كەسانەی سەردانی گوندەكەش دەكەن.

ئەنجومەنی گوندەكەش كە ناوی تەها قادرە بە  PUKmedia ی وت: لە باوكمەوە بیستوومە ناوەڕاستی ئەم دارە كەبە دارە رەش ناسراوە  كونی گەورەی تێدایە و  زۆربەی جار ماری تێدا بینراوە، خەڵكی گوندەكەش بەردەوام خزمەتی دەكەن و پارێزگاری لێ دەكەن.

گوندی بێستانسوور  زیاتر  250 ماڵی تێدایە و سەربە ناحیەی عەربەتە، سەرچاوەیەكی ئاوی باش و چەندین شوێنەواری مێژووی كەلەپوری تێدایە.

داری بەڕوو یەكێكە لەو دارانەی كە لەناوچە شاخەوییەكان  دەڕوێت، زیاتر لە 500 ساڵ تەمەنی دەبێت.

PUKmedia  محەمەد عەبدولرەحمان- شارەزوور