ده‌رفه‌تی زیاتر ده‌درێت به‌مامۆستایانی ناوه‌نده‌ ناحكومییه‌كان

وه‌زاره‌تی په‌روه‌رده‌ی حكومه‌تی هه‌رێمی كوردستان چه‌ند بڕیارێكی له‌باره‌ی مامۆستایانی ناوه‌نده‌ ناحكومییه‌كان ده‌ركردو له‌ بڕیاره‌كه‌دا هاتووه‌ ڕێژه‌ی ئه‌و مامۆستایانه‌ی له‌ دامه‌زراوه‌ی ناحكومی دامه‌زراون ده‌بێت له‌ 80% ی مامۆستایانی دامه‌زراوه‌كه‌ كه‌متر نه‌بێت.

بۆ ئه‌م مه‌به‌سته‌ PUKmedia گفتوگۆی له‌گه‌ڵ مامۆستا بڕیار عه‌لی مامۆستای ئاماده‌یی ناحكومی ڕانیه‌ كردو له‌و باره‌یه‌وه‌ وتی: هۆكاری سه‌ره‌كی له‌و بریاره‌ ئه‌وه‌یه‌ كه‌ له‌ڕێنماییه‌كانی خوێندنی ناحكومی ڕێژه‌ی ئه‌وكه‌سانه‌ دیاریكرابوو كه‌ دامه‌زراوی ره‌سمی حكومه‌تن و له‌ ناوه‌نده‌ ناحكومه‌یه‌كان رێژه‌یه‌كیان بۆ دیاریكرابوو كه‌له‌سه‌دا 20 زیاتر نه‌بێت، به‌ڵام زۆرینه‌ی به‌شه‌ وانه‌كان ئه‌و مامۆستا دامه‌زراوانه‌ ده‌یانگوته‌وه‌و به‌شه‌ وانه‌یه‌كی كه‌م بۆ ده‌رچووه‌ دانه‌مه‌زراوه‌كان ده‌مایه‌وه‌ .
وتیشی: زۆرجار گرێبه‌سته‌كانی مامۆستا دانه‌مه‌زراوه‌كانیش به‌پێی به‌شه‌ وانه‌ كراوه‌و به‌وه‌ش دانه‌مه‌زراوه‌كان بڕێكی كه‌م سودمه‌ند ده‌بوون و سودمه‌ندی سه‌ره‌كی مامۆستا دامه‌زراوه‌كانی حكومه‌ت بوون .

ئه‌وه‌شی خسته‌ڕوو: ده‌بێت  ئامانجی سه‌ره‌كی له‌كه‌رتی ناحكومی ئه‌وه‌ بێت، هه‌لیكار زیاتر بۆ ده‌رچوانی زانكۆ و پایمانگاكان ده‌سته‌به‌ر بكات ، به‌جێبه‌جێكردنی ئه‌و بڕیاره‌ش ئامانجی وه‌زاره‌ت ئه‌وه‌یه‌ له‌ خوێندنگه‌ ناحكومیه‌كان سودمه‌ندی سه‌ره‌كی ده‌رچووی دانه‌مه‌زراو بێت.

جگه‌ له‌وه‌ش له‌ڕووی زانستی و په‌روه‌رده‌ییشه‌وه‌ ده‌رچووه‌ دانه‌مه‌زراوه‌كان  ده‌بنه‌ كاره‌كته‌ری سه‌ره‌كی له‌و ناوه‌نده‌ ناحكومیانه‌و له‌چه‌ند ساڵی داهاتوودا ، كادیری په‌روه‌رده‌یی و مامۆستای زۆرباشیان لێ ده‌رده‌چێت، چونكه‌ ده‌رفه‌تیان له‌به‌رده‌م زیاتر ده‌كرێته‌وه‌ .

PUKmedia ئا / چنار عه‌زیز