ئه‌نفال زامێكی له‌بیر نه‌كراو ..

.

شكۆی نیشتمان و میلله‌ت، مام جه‌لال فه‌رموویه‌تی: ( خزمه‌تكردنی زیاتری كه‌سوكاری سه‌ربه‌رزی شه‌هیدان و ئه‌نفالكراوان ئه‌ركی سه‌رشانمانه‌ و له‌ جێبه‌جێكردنی ئه‌و ئه‌ركه‌دا درێغی ناكه‌ین ).

دوا قینی ره‌گه‌ز په‌رستی و چاوچنۆكی و شۆڤێنیانی رژێمی دڕنده‌ی به‌عسی به‌غدا، به‌ناوی پڕۆسه‌كانی ( ئه‌نفال ) و به‌ هه‌موو ئه‌و شێوازانه‌ی له‌ دوا ترۆپكی دڕندایه‌تیدا ده‌بینرێت، هه‌ر به‌ له‌ناوبردنی جه‌سته‌یی و فه‌رهه‌نگی و ئابووری و فیزیكییه‌وه‌، تا به‌ هه‌موو ده‌رهاوێشته‌كانیان له‌ كه‌لتوور و كه‌له‌پوور ده‌گات .. له‌گه‌ڵ هه‌موو كوشتن و بڕین و ئازار و ئه‌شكه‌نجه‌یه‌كی مێژوویه‌كی پڕ خوێناویدا، پتر له‌ 182 ھه‌زار كورد به‌ گه‌نج و منداڵ و ژن و پیاوی سڤیله‌وه‌ له‌نێو به‌رداشه‌كانی ئه‌نفالدا كرانه‌ خۆراكی سه‌دان گۆڕی به‌ كۆمه‌ڵ و كه‌ره‌سته‌ی تاقیگه‌ی چه‌كه‌ كیمیاوییه‌كانی كۆمه‌ڵكوژ.

 شه‌هیدانی ئه‌نفال .. بێ سه‌روشوێنانی ئه‌نفال، ئه‌و تایبه‌تمه‌ندییه‌ پڕ به‌هایه‌ له‌خۆ ده‌گرن كه‌ ئه‌وان بوونه‌ قوربانی بۆ ئاینده‌ی میلله‌تێك، ئه‌وان ناسنامه‌ی ئازار و به‌ جینۆسایدی میلله‌ت بوون و هه‌موو جیهانیان به‌ ئاگا هێنا .. ئه‌وان بوونه‌ مانشێتی ئه‌و هه‌واڵانه‌ی بێ ده‌نگی جیهانیان شه‌رمه‌زار ده‌كرد به‌رامبه‌ر به‌و زوڵمه‌‌  گه‌وره‌ مێژوویینه‌ی میلله‌تی كوردی تووشی سه‌دان و هه‌زاران نه‌هامه‌تی ماڵوێرانی و له‌ناوبردن كردبوو ..

 ئه‌نفال .. كاره‌ساتی نه‌ته‌وه‌یه‌كه‌، ئه‌وه‌ جه‌سته‌ی خڵتانی خوێن و ئازاری میلله‌تێكه‌، ئه‌وه‌ پرۆسه‌ی له‌ناوبردنی میلله‌تی كورد بووه‌ و هه‌موو كورد خاوه‌نیه‌تی .. هه‌موو مرۆڤایه‌تی خاوه‌نیه‌تی، ئازاری ئه‌م جینۆسایده‌ بێ وێنه‌یه‌ سنووری نه‌ته‌وه‌یه‌كه‌و یادو بۆنه‌كه‌ی تایبه‌ت و موڵكی نه‌ته‌وه‌یه‌كه‌ كه‌ نه‌ته‌وه‌ی كورده‌. مامه‌ڵه‌ی دروست له‌گه‌ڵ ئه‌م كاره‌ساته‌ ده‌گمه‌نه‌دا هه‌ر به‌و جۆره‌ش ده‌بێته‌ بۆنه‌یه‌كی به‌رز راگیراوی هه‌تاهه‌تایی له‌ دیرۆك و مێژووی كورد و  كوردستان و ئاینده‌دا، هه‌ر بۆیه‌ ده‌كرێت :

له‌ گه‌وره‌ترین مۆزه‌خانه‌دا به‌ نوێترین شێوازی ته‌كنیكی ته‌واوی دۆكیۆمێنت و ئاسه‌واره‌كانی ( ئه‌نفال )كۆ بكرێته‌وه‌ و حكومه‌ت به‌ فه‌رمی یادی بكاته‌وه‌ و بانگهێشتی چه‌ندین دۆست و  میوانی جیهانی بۆ بكرێت.

به‌رزترین و گه‌وره‌ترین و شایسته‌ترین مۆنۆمێنتیان بۆ بكرێت له‌ پایته‌ختی هه‌رێمدا كه‌ ببێته‌ جێی سه‌رنجی گه‌شتیاران له‌ جیهاندا.
هه‌موو خزمه‌ت و بایه‌خدانێك به‌ ژیان و باری ده‌روونی كه‌س و كاری پله‌ یه‌كی ئه‌نفالكراوان بدرێت و ئاستی گوزه‌رانی ژیانیان له‌ هه‌موو بوارێكدا باش و به‌رز بكرێته‌وه‌.

ئه‌مرۆش ئاسووده‌یی رۆحی پاكی ئه‌وان و دڵنه‌وایی دڵه‌ كه‌یله‌كانی چاوه‌ڕوانی ته‌نیا به‌ په‌رۆشبوونه‌ له‌ كرداره‌كانی هه‌موواندا بۆ سۆراخی ته‌واو و پێشكه‌شكردنی دوا پله‌ی هه‌موو جۆره‌‌ خزمه‌تگوزارییه‌كان به‌ كه‌س و كاره‌كانی ئه‌نفالكراوان.

دروود و سڵاو له‌ گیانی به‌رزه‌فڕی قوربانیانی ئه‌نفال و سه‌رجه‌م شه‌هیدانی كوردستان.

PUKmedia هیوا سه‌رهه‌نگ