سەرۆك كۆمار: كەسوكاری ئەنفالكراوان شایستەی ئاوڕلێدانەوەی زیاترن

.

ئەمڕۆ 14-4-2021،  د. بەرھەم ساڵح، سەرۆك كۆماری عیراق بەبۆنەی ساڵیادی كارەساتی ئەنفالەوە پەیامێكی بڵاوكردەوە و رایگەیاند، كارەساتی ئەنفال، یادی تاوانێكی دڕندانەی لە بیرنەكراوە دژ بە خەڵكی كوردستان، تاوانێك كە بە ئامانجی كۆمەڵكوژی میللەتێك دەستی غەدر و كوشتنی لە ژن و منداڵ و پیر و جوانی كوردستان نەپاراست.

دەقی پەیامەكەی سەرۆك كۆمار:

یادەوەری كارەساتی ئەنفال، یادی تاوانێكی دڕندانەی لە بیرنەكراوە دژ بە خەڵكی كوردستان، تاوانێك كە بە ئامانجی كۆمەڵكوژی میللەتێك دەستی غەدر و كوشتنی لە ژن و منداڵ و پیر و جوانی كوردستان نەپاراست.

لەم یادەوەریە تاڵەدا، گەل پێویستی بەیەك ریزی و بونیاتنانەوەی گیانی پێكەوەھەڵكردن و یەك ئیرادەیی و یەكخستنی ھەموو ھەوڵ و تواناكانە بۆ رێگەگرتن لە دووبارەبوونەوەی ئەو زوڵم و زۆرداری و كارەسات و مەرگەساتانەی لە پڕۆسەی بەدناوی ئەنفالدا وەك تراژیدیای سەدە بەسەر خەڵكی ناوچە جیاوازەكانی كوردستان و تەواوی عیراقدا ھات.

كەسوكاری شەھیدان و قوربانیانی ئەنفال، شایستەی ئاوڕلێدانەوە و بەدەنگەوەھاتنی زیاترن، برینی ئەوان، برینی سەر دڵی نیشتمانە، خواستەكانیان بۆ ژیانێكی شایستە و پێشكەشكردنی ماف و خزمەتگوزاری و گەڕاندنەوەی رووفاتی ئازیزانیان، خواستی راست و رەوانن و پێویستە چیتر ئەو داواكاری و مافە رەوایانە، بۆ رۆژگار بەجێنەھێڵدرێن و زووبەزوو تەكبیرێكی یاسایی و پێكەوەیی بۆ بە پیرەوەچون و بەواقعكردنیان بكرێت.

بەرھەم ساڵح

سەرۆك كۆماری عیراق

PUKmedia نووسینگەی راگەیاندنی سەرۆكایەتی كۆمار