نەخشەبەردێكی دەگمەن لە دهۆك دەدۆزرێتەوە

.

پەیكەرێكی تەمەن سێ هەزار ساڵە لە سنووری دهۆك دۆزرایەوە و بەڕێوەبەرایەتی شوێنەواری دهۆك-یش رایدەگەیەنێت، نەخشەبەردێكی دەگمەنی شوێنەواریان دۆزیوەتەوە كە مێژووەكەی بۆ هەزارەی یەكەمی پێش زاین دەگەڕێتەوە و یەكێكە لە پارچە شوێنەوارییەكانی سەردەمی زەردەشتییەكان.

ئەمڕۆ دوو شەممە 21-12-2020 حەسەن ئەحمەد بەڕێوەبەری بەڕێوەبەرایەتی شوێنەواری پارێزگای دهۆك بە PUKmedia ی راگەیاند: نەخشەبەردێكی دەگمەنی شوێنەواری نەخشدار لە نزیك گوندی گەرماڤای قەزای سیمێل دۆزراوەتەوە كە مێژووەكەی دەگەڕێتەوە بۆ هەزار ساڵ پێش زاین و یەكەمینجارە نەخشەبەردێكی لەمجۆرە دەدۆزرێتەوە.

وتیشی: ئەو شوێنەوارەی دۆزراوەتەوە پێدەچێت وێنەی رەبەنێك یان پادشایەك یان كاهینێكی زەردەشتی بێت، بەرزی نەخشەبەردەكە مەترێك و 9 سم و پانییەكەی 54 سم و تیرەكەشی 45 سانتیمەترە و تاوەكو ئێستا نەخشە بەردێكی لەم شێوەیە لە جیهاندا نەدۆزراوەتەوە.

بەڕێوەبەری بەڕێوەبەرایەتی شوێنەواری پارێزگای دهۆك راشیگەیاند: پێشتر چەند شوێنەوارێكی دیكەی زەردەشتییەكان لە سنووری پارێزگای دهۆك دۆزراونەتەوە كە پاشماوەی زەردەشتییەكان بوون و شێوازی دروستكردن و جلوبەرگی ئەم نەخشەبەردە جێگای سەرنجە. 

دەشڵێت: مێژووی ئەو نەخشەبەردە بۆ هەزارەی یەكەمی پێش زایین دەگەڕێتەوە، بە مەبەستی لێكۆڵینەوەی زیاتر و دۆزینەوەی شوێنەواری دیكە بەڕێوەبەرایەتی شوێنەواری پارێزگای دهۆك لەگەڵ ژمارەیەك لە زانكۆكانی جیهان پەیوەندی هەیە.

PUKmedia ژینەر محەمەد