ئەکید بە دێم

.

ئەکید بە دێم

ئێستا سەعات فێڵ و بیستی پاش درۆیە
گوڵ پەژموردە و
خۆشەویستیی دەسخەڕۆیە
وەفا ماڵی گواستۆتەوە
گەنم وێڵە بەدوای هەورا
نازانێ باران لەکوێیە
ژیان خۆی لێ بووە بەبار
کەچی سەیری نەگبەتیی کە
مەوعیدەکەمان ئەمڕۆیە
هێزی ئەژنۆم نییە هەستم
ئەشزانم یار چاوەڕێیە
زیز مەبە لێم
بشمرم دێم
وەک بەفر بۆ ژوانی هەتاو
من دەمێکە
ئەو جۆرە مەرگەم حەز لێیە
دێم دێم دێم دێم
ئەگەر ترس راوم نەنێ
تەمەن قەشمەریی لێ نەیە و
پێ نەکەنێ
ئەکید بە دێم
مەگەر خوانەخواستە گومان
بێتە سەر رێم
یان شوورەیی قۆڵم بگرێ و بڵێ نەکەی
مامۆستای دیین هاوار بکا
بڵێ حەیای مەکتەب نەبەی
ئەکید بە دێم
با شار هەمووی کامێرا بێ
رەقیب خۆی لەوێ وەستابێ
دێم دێم دێم دێم
کە هاتم زوو بمناسەوە
درەختێکم گەڵا زەرد و
وشک و بێزار
چەماوەم وەک پشتی کۆڵبەر
یان با بڵێین
رێک وەکو نیشانەی پرسیار