بە تایبەت ئەگەر

.

بە تایبەت ئەگەر

* نیوەشەو بزمار بە دیواردا دامەکوتە، بە تایبەت ئەگەر شوققەکەی سەرەوەت درێلی ھەبوو.

* قەت بە دایکی مناڵەکان مەڵێ نەخێر، بەتایبەت ئەگەر لێی پرسیت زەعیف نەبووم؟

* پزیشکەکان دەڵێن ماسک زۆر زۆر زەروورە بۆ ئافرەت، بەتایبەت ئەگەر سمێڵی ھەبێت.

* زۆر غەڵەتە شیعری نزار قەبانی بۆ دەزگیرانەکەت بخوێنیتەوە، بەتایبەت ئەگەر ناوی نەسروڵابێ.

* ھەر بەڕاستی میوان خۆشەویستی خوایە، بە تایبەت ئەگەر نەیەت.

* ئەبەدەن نابێت لەبەرچاوی مورافیق بە نەخۆش بڵێی فشی کە، بە تایبەت ئەگەر دکتۆری ددان بوویت.

* ئەتوانیت بەڵێنەکانی حکومەت بکەیت بەبەرچایی، بەتایبەت ئەگەر مـرەباتان نەمابوو.

* بڕوا بەقسەی کوتاڵفرۆش مەکە، بەتایبەت ئەگەر وتی خێزانەکەی خۆم لەمەی کردووە بە ماکسی.

* باسی کوردایەتی و شعوری قەومی لێی ئاسانتر نییە، بەتایبەت ئەگەر پەرلەمانتاری بەغدا بیت.

*جەریدەی ئێستا کەڵکی نەماوە، بەتایبەت ئەگەر بتەوێ سەوزەی لەسەر پاک بکەیت.

* ئەمریکییەکانیش بەقەدەر ئێمە گەوجن، بەتایبەت ئەگەر ترەمپ ھەڵببژێرنەوە.

* سیاسەت لە چەکی کیمیایی پیسترە، بەتایبەت ئەگەر بەدەست خەڵکی نەزانەوە بێت.