كەنەدا.. لە رووداوێكی نەخوازراودا گەنجێك گیانی لەدەستدا

.

گەنجێك بەناوی دلێر رەزاق ئیبراهیم لە دایكبووی ساڵی 1981 ی هەولێر،  رۆژی 10-6-2020 لە شاری بیرلنگتۆنی هەرێمی ئۆنتاریۆ - ی كەنەدا بێسەر و شوێن دەبێت و پاش دوو رۆژ پۆلیس كەسوكاری ئاگادار دەكاتەوە كە تەرمی دلێر لە كەنار دەریاچەی بیرلینگتۆن دۆزراوەتەوە .

سەلاح رەزاق ئیبراهیم سەبارەت بەڕووداوی گیان لەدەستدانی دلێری برای لە میانەی دوا دیداری تەرمەكەی لە مزگەوتی ماركام  لە لێدوانێكدا بۆ PUKmedia وتی:  دلێری برام  لە ساڵی 2007 هاتۆتە كەنەدا و لەساڵی 2009 هاوسەرگیری لەگەڵ كچێكی كەنەدی كردووە و كچێكی تەمەن پێنج ساڵ و كوڕێكی تەمەن دوو ساڵی هەیە .

سەڵاح لە درێژەی باسەكەیدا ئاشكرایكرد: دلێری برای پێشتر كێشەی خێزانی لەگەڵ هاوسەرەكەی هەبووە و لە 4 ی حوزەیران  واتە هەفتەیەك پێش رووداوەكە لە بنكەی پۆلیسی ئۆكڤێل سكاڵای لەسەر هاوسەرەكەی تۆمار دەكات و پێیان رادەگەیەنێت كە هەڕەشەی لێكراوە و ژیانی لە مەترسیدایە دلێر بۆ پاراستنی ژیانی خۆی داوای هاوكاری پۆلیسی كردبوو، بەڵام پۆلیس بایەخی بە داواكارییەكەی دلێرنەدا و بەپێچەوانەوە دوای دوو رۆژ لە تۆمار كردنی سكاڵاكەی لە هەمان بنكەی پۆلیس دلێر بۆ مەبەستی زانیاری زیاتر بانگهێشت دەكرێت و هاوكات دەستگیری دەكەن .

   سەلاح ئیبراهیم راشیگەیاند:  لە رۆژی 9-6-2020  دڵری برام لە زیندانی پۆلیس بە كەفالەت ئازاد كرد و لای من مایەوە، بەڵام یەك رۆژ دواتر واتە لە 10 ی حوزەیران دلێر هیچ سۆراخێكی نەما و پۆلیسمان ئاگادار كردەوە كە دلێر بێسەرو شوێنە، پاشان لە رۆژی 12-6-2020 ئاگادار كراینەوە كە تەرمی دلێر لە كەنار دەریاچەی بیرلێنگتۆن دۆزراوەتەوە و ئاسەواری لێدان بەسەریەوە دیارە .

لەبەشێكی وتەكەیدا سەلاح ئیبراهیم بە خەمێكی قولەوە وتی: گیان لەدەستدانی دلێر تراژیدیایەكی پڕ لەشەرمە بۆ دەزگای پۆلیس كە براكەی پێشتر پۆلیسی لەوە ئاگادار كردۆتەوە كە مەترسی لەسەر ژیانی هەیە،  بەڵام پۆلیس كەمتەرخەم بوون و بایەخیان بە مەسەلەكە نەدا.

سەڵاح  راشیگەیاند: راپۆرتی پزیشكی دادوەری نیشانی داوە كە  براكەم لە سەری دراوە و دواتر فڕێدراوەتە ناو رووبارەكەوە .

لە كۆتاییدا سەلاح رەزاق ئیبراهیم وتی: كارەساتی دلێر تووشی ئازار و خەمێكی گەورەی كردین چونكە پاش دوو مانگ سەڕەڕای ئەوەی ئەنجامدەرانی ئەو رووداوە ئاشكرا نەكراوە، هێشتا كەیسی دلێر یەكلایی نەبۆتەوە و تەرمەكەشی تا ئێستا لە ژێرلێكۆڵینەوە و شیكاری تەندرووستیدایە، بەپێی وتەی پارێزەرانی دۆسیەكە ئەم رووداوە كات و بەدواداچوونی زۆری دەوێت تا راستیەكان ئاشكرا دەكرێن، بێگومان ئەمەش باری ئاسایش و پاراستنی ژیانی مرۆڤەكان لە كەنەدا ئەخاتە ژێر پرسیارەوە، سەڵاح خوازیاریشە بە زووترین كات لێكۆڵینەوەی دۆسییەی گیان لەدەستدانی دلێر برای كۆتایی پێ بهێنرێت  و تاوانبارانیش ئاشكرابكرێن و دادگاش ڕۆڵی دادپەرانەی خۆی ببێنێت.

PUKmedia عوسمان عەلی- تورۆنتۆ