عیراق.. كار بۆ گێڕانه‌وه‌ی پارچه‌ شوێنه‌واره‌كان له‌ئه‌مریكا ده‌كرێت

.

وه‌زاره‌تی رۆشنبیری، ئه‌مڕۆ یه‌كشه‌ممه‌ باسی له‌و میكانیزمانه‌ كرد بۆ گێڕانه‌وه‌ی شوێنه‌واره‌ براوه‌كانی عیراق، كه‌ له‌ئێستادا له‌لای كۆمپانیای هوبی لوبی و مۆزه‌خانه‌ی كتێبی پیرۆز له‌ شاری واشنتۆن گلدراونه‌ته‌وه‌، كه‌ ژماره‌یان 3817 پارچه‌ی شوێنه‌واره‌، بۆ سه‌رده‌مه‌ جیاجیاكانی شارستانی دۆڵی رافیده‌ین ده‌گه‌ڕێته‌وه‌.

وه‌زاره‌تی رۆشنبیری، له‌ راگه‌یه‌نراوێكدا ئاشكرایده‌كات، حه‌سه‌ن نازم وه‌زیری رۆشنبیری و گه‌شتوگوزار و وشوێنه‌وار له‌گه‌ڵ موحسین سه‌دخان سه‌رۆكی ده‌سته‌ی شوێنه‌وار و كه‌له‌پوور، و هه‌ردوو به‌ڕێوه‌به‌ره‌ گشتییه‌كان و به‌ڕێوه‌به‌ری به‌شی گێڕانه‌وه‌ و وه‌رگرتنه‌وه‌، باسیان له‌ میكانیزمه‌كانی گێڕانه‌وه‌ی شوێنه‌واره‌ براوه‌كانی عیراق كردووه‌ كه‌ له‌لای كۆمپانیای هوبی لۆبی، و مۆزه‌خانه‌ی كتێبی پیرۆز له‌ شاری واشنتۆن له‌ئه‌مریكا گلدراونه‌ته‌وه‌، ژماره‌یان 3817 پارچه‌ی شوێنه‌واره‌، بۆ سه‌رده‌مه‌كانی شارستانی دۆڵی رافیده‌ین ده‌گه‌ڕێته‌وه‌.

وه‌زیری رۆشنبیری راشگه‌یاند: به‌خێرایی كار بۆ گێڕانه‌وه‌ی ئه‌و شوێنه‌واره‌ براوانه‌ ده‌كه‌ن به‌گوێره‌ی میكانیزمێك گره‌نتی گێڕانه‌وه‌ی به‌سه‌لامه‌تی بۆ عیراق بكات، ئه‌وه‌ش به‌پێی یادداشتێكی لێكتێگه‌یشتن له‌نێوان هه‌ردوولا كه‌ مافی عیراقی تێدا پارێزراو بێت بۆ گێڕانه‌وه‌ی سامانی رۆشنبیریی وڵاته‌كه‌ی.

هاوكات، نازم راشیگه‌یاند: هه‌وڵی ئه‌وه‌ ئه‌ده‌ن به‌خێرایی ئه‌و شوێنه‌وارانه‌ش بگه‌ڕێننه‌وه‌ كه‌ له‌لای زانكۆی كۆرنیلی ئه‌مریكییه‌ و 5831 پارچه‌ی شوێنه‌واره‌، به‌هه‌ماهه‌نگی له‌گه‌ڵ وه‌زاره‌تی ده‌ره‌وه‌ و به‌شی گێڕانه‌وه‌ له‌ ده‌سته‌ی شوێنه‌وار و كه‌له‌پوور، كه‌ له‌ماوه‌ی چه‌ند رۆژی داهاتوودا، پێداویستییه‌كانی گێڕانه‌وه‌ی شوێنه‌واره‌كان ته‌واو ده‌كرێت.

 PUKmedia راگه‌یاندنی وه‌زاره‌تی رۆشنبیری