تەنکی سەربان

.

تەنکی سەربان

– چییە کەللەپووت؟! ئاگام لێیە زەردەوسمە ئەتگرێ.
+ ھیچ نییە قوربان، شتێکی عائیلییە.

– جا عائیلەی ھەناسە ساردی ئێستا چی تیایە ببێتە باعیسی زەردەخەنە، ھەمووی ھەر خەم و خەفەت و خەبەری ناخۆشە، یەکێ شعوری ھەبێ چۆ….
+ باشە باش ئوستازگیان، ناماقوڵیم کرد، ئەو زەردەخەنەیەشمان لەخوا ویست، تەواو دڵت ئیسراحەتی کرد؟

– نا.. دڵی من وەختێ ئیسراحەت ئەکات کە راستییم پێ بڵێی، تۆ لە خۆتەوە دڵت خۆش نابێ، ھەڵبەتە لە شوێنێک وەعدی شتێکیان پێ داوی.
+ ھای قوڕ بەسەرم، وەعدی چی؟ مەگەر وەکو کابرا سواری ھالیکۆپتەرەکەی وانێکم لێبکەن.

– مەوزوع مەگۆڕە، راست و رەوان پێم بڵێ بۆچی لەبەر خۆتەوە پێ ئەکەنیت؟
+ بە مسحاف شتێکی عائیلی بوو، نازانم تۆ بۆ باوەڕ بەھیچی من ناکەی؟

– نا، عائیلی نییە، من و تۆ بەس حەڵاڵمان لەیەک جیایە، عائیلی بوایە نەتئەشاردەوە.
+ باشە قوربان، ئەلحوکمولیللا، با لە نوکەوە بۆت بگێڕمەوە.

– لە نووکەوە نا، تاقەت و حەوسەڵەی درێژداڕییم نییە، یەکسەر بچۆرە مەوزوعەوە.
+ بەڵێ باش، خاڵە عەزیزم ماوەیەکە کەس ناناسێتەوەو شتی بیر ئەچێتەوە.

– ئێ ئەوە هی تەمەنەکەیەتی، بەڵام با دکتۆریش بیبینێ، بەشکو دەرمانێ، شرینقەیە، شتێ بۆی ببێ بە شیفا.
+ بردمان بەگم، حەبێکی بۆ نووسی رۆژی دەنکێکی لێ بخوات، کەچی خاڵۆژنم بە غەڵەت رۆژی سێ دەنکی داوەتێ.

– ئۆۆۆوو، جا ئەوە زۆر خەتەرە رۆڵە.
+ نەوەڵڵا بەعەکسەوە گەورەم، نەتیجەی زۆر باشی ھەبوو، ئێستا خاڵۆ عەزیز نەک ھیچی بیرناچێتەوە، سوبحانەڵڵا وای لێهاتووە پێشبینییش ئەکات.

– پێشبینییی؟؟؟
+ ئەرێ وەڵڵا پێشبینیی، ئەو رۆژە ھەموومانی کۆکردەوە وتی ئەم مانگەش بە تەمای مەعاش مەبن.

– ئەشهەدوبیللا موھیمە، باشە تۆ بڵێی تەئسیری حەبەکە بێ کە زۆری لێ خواردووە.
+ ئەی قابیلە لەخۆڕایی وای لێهاتبێ!

– کەواتە باوکەکەی باوکمی بڕۆ دوو پاکەتم لەو حەبە بۆ بکڕە، خزمێکی مەسئولمان ھەیە رابوردووی خۆی بیرچۆتەوە، بیدەینێ بزانین ئیستیفادەی لێ ئەکات.
+ خۆت ھیلاک مەکە قوربان، ئەوانە بە حەبێک و دوان چاک نابن، ئەبێ بە کارتۆن بۆیان بخەیتە تەنکی سەربانەوە.