سۆزی داریوش

.

سۆزی داریوش

* كوڕی باشیی مالكی هیچ لە قوڕمساغیی عەبادی كەم ناكاتەوە.
-شاندی دانوستانكاری هەرێم-

* خراپیی حكومەت هیچ لە بودەڵەیی ئیعلام كەم ناكاتەوە.
-شێخ نەماوێك-

* داخستنی فەرمانگەكان یەك زەڕە بەرهەمی هەرێم كەم ناكاتەوە.
-پسپۆڕێكی ئامار-

* رەزاگرانیی دەسەڵات هیچ لە ناشیرینیی ئۆپۆزیسیۆن كەم ناكاتەوە.
-چاودێرێكی سەربەخۆ-

* كوردپەروەرییەكەی ئەردۆغان بە قەدەر تاڵە موویەك قوڕمساغیی بەششار كەم ناكاتەوە.
-كوردێكی رۆژئاڤا-

* باوكی قەیرانی داراییش ئەوەندەی سەرەسۆدەیەك تەماعی دووكاندار كەم ناكاتەوە
-كڕیارێكی راشكاو-

* دڕندەیی گورگ هێندەی پشقلێك بێڕەحمیی قەساب كەم ناكاتەوە.
-هەقایەتی مەڕێك بۆ بەرخەكەی-

* هەزار فلیمی هۆڵۆكۆست بایی قنگە جگەرەیەك بێ شەرەفیی داعش كەم ناكاتەوە.
-كچە ئێزدییەك-

* فێڵ و فەرەجی تاران میللیمەترێك لە ساختەچێتیی ئەمریكا كەم ناكاتەوە.
-عەرەبێكی سەلەفی-

* دەنگخۆشیی شەجەریان هیچ لە سیحر و سۆزی داریوش كەم ناكاتەوە.
-مۆسیقارێك-