بۆ ئەوە باشە بیگریت

.

بۆ ئەوە باشە بیگریت

–ئای دنیا… نەمردین ژێرەكشیمان بینی.. تۆ باوەڕت ئەكرد وابێ؟
+بەڵێ ئەی چۆن. تۆ خۆت، سەدساڵ عومرت بێ، ھەموو جارێ بۆت باس نەئەكردین ئەتگوو قسەی ئیعلام و میعلام دەستخەڕۆت نەكات. شتەكە بە تڕ بەندە.

–من وام ئەگوو؟
+تەبعەن. ماشەڵڵات لێ بێ ھەممو دەققەیەك ئەم ڕۆژەت لەبەر چاو بوو. ئەتزانی كەرێك بە پارەی بەفر بیكڕیت ئاو ئەیبات.

–كەری چی عەیبە كوڕم .خەڵك گوێی گرتووە.
+باشە لەبەرخاتری جەنابت ئەوا كردم بە گوێدرێژ.

–ئافەرم.. گوێدرێژ موسەقەفانە ترە و لەگەڵ عەولەمەشدا ھەڵ ئەكات .موشكیلەی نییە.
+ كام نەوعەیان ئەفەرمووی گەورەم؟

–فەرق ناكات دێز بێ سپی بێ عەینی شتە.
+خوا عافووت بكات ئوستاز گیان، من گوێدرێژت عەرز ناكەم. سوعالەكەم لەسەر عەولەمە بوو. عەرزم كردیت پرسیم لە گەڵ چ جۆرەعەولەمەیەكدا ھەڵ ئەكات؟

–ئەڵێی ئەئاوا بكێشم بە قوژبنی دەمتا. یەعنی چی كام جۆرە عەولەمەیە؟! عەولەمە ھەر یەك نەعی نییە؟
+نا بەگم. ئەو مەعلوماتە كۆنە. ئێستا عەولەمەی بازرگانیمان ھەیە و عەولەمەی بایۆلۆجییش.

–شتی وام نەبیستووە. ئەم بایۆلۆجییە خۆت دروستت كردووە.
+چی خۆم دروستم كردووە، خۆ من موختەبەرەكانی ئەمریكا نیم.

–نەگبەت ئەزانی چی؟! من شەو تا خواڕۆژ ئەكاتەوە سەیری قەناتە ھینەكان ئەكەم و بەقەد تووكی سەری تۆش موجەلەم لە دەلاكخانەدا خوێندۆتەوە، عەولەمەی بایۆلۆجییم نەبیستووە و تێی ناگەم.
+ قوربان گیان عەولەمەی بایۆلۆجی بۆ ئەوە درەست نەكراوە تێی بگەیت.

–ئەی؟؟؟
+ بۆ ئەوە دروست كراوە عەیب نەبێ بیگریت.

–ھەر حاڵیی نەبووم.
+ئوستاز گیان ئێستا زۆر دوور نەڕۆین مەسەلەن حەسەن زیرەك.

–ئێ؟!
+گوێی لێ بگریت خۆشترە یان بیناسیت؟

–تەبعەن گوێی لێ بگریت.
+دە عەولەمە بایۆلۆجییەكەش وایە. بەس بۆ ئەوە باشە بیگریت نەك لێی تێ بگەیت.

_چی بگرم مەلعون؟
+كۆرۆنا.