بێستان رنن

.

بێستان رنن
تا چاوی گێزەر بڕ ئەکات
ھەتاکو دوا قرقێنەی توور
بمسووتێنە لە ئاگری تووڕەییتدا
ئەی جەنابی بیبەری سوور
****
ئاخ بۆ ھاڵاوی شێلمێ
زوقمی دووریی تۆ نەھێڵێ
ئاخ بۆ ئەو قاشە کالیارەی
تامی ماچە مزرەکانت
لە منداڵیمدا جێ بێڵێ
****
ئەوەی شەخسییەت ئەبەخشێ
بە ترشیات
تەنها ھەر سیری عەجەمە
ئاڤوکادۆش لەناو جەمعی سەوزەواتدا
پاشایە و صەدری ئەعزەمە
****
سوپاس حکومەت
سیاسەتی کارەبایی و نەوت و غازت
ئەمباتەوە بۆ فۆلکلۆر
بۆ ترخێنە و تەڕەماش و
جوێن بە وەی نانی بۆت تەڕ کرد
سیاسەتی نەوت و غازت
ئەمباتەوە
ژێر لێفە بۆر
****
سەد ماشەڵڵا لە تەماتە
بۆ ھەموو خواردنێک ئەشێ
بۆ ناو شلە و
ناو زەڵاتە و ترش و پیازیش
دروود لە سیحری حزبەکان
ھەم بەشێکی دەسەڵاتن
ھەم ناڕازییش
****
زۆر دەمێکە
شەمامە و عەمبەروەرید و
چلورەکەی شەھلا ونن
زۆر دەمێکە
ھەڤاڵەکان
کاڵەک خۆری بێستان رنن