فینلاند.. ساڵیادی دامه‌زراندنی كۆمه‌ڵه‌ ده‌كرێته‌وه‌

.

رۆژی شه‌ممه‌ 8-2-2020 له‌ شاری ئیسپۆ ئاهه‌نگی 50 هه‌مین ساڵیادی كۆمه‌ڵه‌ كرایه‌وه‌ و به‌ به‌شداری زۆرێك له‌ نوێنه‌ری حزب و رێكخراوه‌ سیاسیه‌ كوردستانیه‌كان، و له‌سه‌ر بانگهێشتی فه‌رمی كۆمه‌ڵه‌ وه‌فدی كۆمیته‌ی رێكخستنی یه‌كێتی نیشتیمانی كوردستان له‌ فینلاند به‌شداری یاده‌كه‌ بوون، وه‌فده‌كه‌ پێك هاتبوو له‌ جه‌بار جومعه‌ لێپرسراوی كۆمیته‌ و ئه‌حمه‌د خۆشناو كارگێڕی چاودێری و به‌دواداچوون و شاهۆ مه‌لا وه‌یسی به‌رپرسی به‌شی دارایی كۆمیته‌، هه‌روه‌ها  ژماره‌یه‌كی به‌رچاوو له‌ ره‌وه‌ندی كوردستانی به‌شداری ئاهه‌نگه‌كه‌ بوون.

سه‌ره‌تا له‌سه‌ر ئاوازی سروودی ئه‌نته‌رناسیۆنالی كرێكاران ئاهه‌نگه‌كه‌ ده‌ستیپێكرد، پاشان بۆ رێزگرتن له‌ گیانی پاكی شه‌هیدانی كورد و كوردستان  و گیانبه‌ختكراوان  ئامه‌ده‌بووان ده‌قیقه‌یه‌ك به‌پێوه‌ وه‌ستان.

دوای ئه‌وه‌ به‌خێرهاتنی ئاماده‌بووان كرا و چه‌ند دێڕێكی شیعری پێشكه‌ش كران، پاشان په‌یامی حزبه‌كان به‌م شێوه‌یه‌، پێشكه‌ش كران، سه‌ره‌تا په‌یامی رێكخراوی فینلاندای كۆمه‌ڵه‌، په‌یامی كۆمیته‌ی ناوه‌ندی كۆمه‌ڵه‌، كۆمه‌ڵگای دیموكراتیكی كورد له‌ فینلاند، جه‌بار جومعه‌ په‌یامی كۆمیته‌ی خوێنده‌وه‌ و ئاماژه‌ی به‌وه‌كرد كه‌ كۆمه‌ڵه‌ بۆته‌ هێزێكی كاریگه‌ر و پێشه‌نگ له‌ كۆمه‌ڵگای كوردستانی رۆژهه‌ڵات و له‌ ماوه‌ی ئه‌م 50 ساڵه‌ی رابردوو نه‌ك هه‌ر جیهان به‌ڵكو ئێران و كوردستان گه‌لێك گۆڕانی گه‌وره‌ و بنه‌ڕه‌تیان به‌ خۆیانه‌وه‌ بینیوه‌، به‌ڵام كۆمه‌ڵه‌ توانیویه‌تی وێڕای هاوته‌ریب كردنی له‌گه‌ڵ گۆڕانه‌ خێرا و به‌رچاوه‌كان، كاریگه‌ری هه‌بووه‌ له‌سه‌ر زۆرێك له‌ره‌هه‌نده‌ كۆمه‌ڵایه‌تی و سیاسی و كولتووریه‌كانی كۆمه‌ڵگای كوردستانی رۆژهه‌ڵات، دواتر په‌یامی پارتی ژیانی ئازادی كوردستان، هیوا شوانی په‌یامی كۆمه‌ڵه‌ی پێشمه‌رگه‌ دێرینه‌كانی كوردستانی خوێنده‌وه‌، پارتی دیموكراتی كوردستان، حزبی دیموكراتی كوردستانی ئێران، بزوتنه‌وه‌ی گۆڕان، حزبی دیموكراتی كوردستان.

پاشان له‌سه‌ر ده‌نگی  هونه‌رمه‌ندان و ئاوازی گۆرانی كوردی و هه‌ڵپه‌ركێ  ئاهه‌نگه‌كه‌ تا دره‌نگانی شه‌و درێژه‌ی هه‌بوو.

PUKmedia جه‌بار جومعه‌