ئاگادارییه‌ك بۆ ئه‌و هاووڵاتیانه‌ی كارتی نیشتمانییان نیه‌

.

له‌ راگه‌یه‌نراوێكدا به‌ڕێوه‌به‌رایه‌تی گشتی ره‌گه‌زنامه‌ی هه‌رێمی كوردستان، "تیایدا هاووڵاتیانی له‌باره‌ی پڕكردنه‌وه‌ی فۆرمی كارتی نیشتمانی به‌شێوه‌ی ئۆنڵاین ئاگادار كردوه‌ته‌وه‌ و نوسیویه‌تی،"له‌ ئێستادا ده‌توانن به‌شێوه‌ی (ئۆنڵاین) راسته‌وخۆ له‌ رێگای ئه‌م لینكه‌وه‌ www.nid-moi.gov.iq له‌سـه‌ر كومپیوته‌ر له‌ماڵی خۆت فۆرمی‌ كارتی‌ نیشتمانی‌ پربكه‌یته‌وه‌ و بیبه‌یت بۆ فه‌رمانگه‌ی‌ كارتی‌ نیشتمانی‌ و مامه‌ڵه‌ی پێ بكه‌یت".

ئاماژه‌ به‌وه‌شكراوه‌ كه‌ پێویسته‌ به‌رنامه‌ی (acrobetpro) له‌ كۆمپیوته‌ره‌كه‌ت هه‌بێ یان، له‌ گوگڵ داونلۆندی بكه‌یت بۆ ئه‌وه‌ی باركۆدی فۆرمه‌كه‌ بخوێنێته‌وه‌.

له‌ئێستادا له‌سه‌رتاسه‌ری عێراق كار به‌كارتی نیشتیمانی ده‌كرێت و هه‌ر هاووڵاتییه‌ك ئه‌و كارته‌ی هه‌بێت ده‌توانێت له‌جیاتی پێناسی باری شارستانی و ره‌گه‌زنامه‌ به‌كاریبهێنێت و له‌داهاتووشدا به‌ته‌واوی ده‌بێته‌ جێگره‌وه‌ی ره‌گه‌زنامه‌ و پێناسی باری شارستانی.

PUKmedia راگه‌یاندنی به‌ڕێوه‌به‌رایه‌تی گشتی ره‌گه‌زنامه‌ی هه‌رێمی كوردستان