كۆمیته‌ی یۆنان په‌نابه‌ران ئاگادار ده‌كاته‌وه‌

.

كۆمیته‌ی رێكخستنی یۆنانی یه‌كێتیی نیشتمانیی كوردستان، سه‌باره‌ت به‌كردنه‌وه‌ی سنووری یۆنان و وڵاتانی باكووری ئه‌وروپا به‌ڕووی په‌نابه‌راندا، ئاگادارییه‌ك ئاڕاسته‌ی په‌نابه‌ران و كوردستانیان ده‌كات كه‌ ئه‌مه‌ ده‌قه‌كه‌یه‌تی:

له‌ كۆمیته‌ی رێكخستنی یه‌كێتیی نیشتمانیی كوردستانه‌وه‌ له‌یۆنان، بۆ په‌نابه‌ران و كوردستانیانی خۆشه‌ویست..
 
 هه‌روه‌كو ئاگادارن ماوه‌ی چه‌ندرۆژێكه‌ جارێكی تر ده‌نگۆی ئه‌وه‌ بڵاوبۆته‌وه‌ كه‌ گوایه‌ سنووری یۆنان و وڵاتانی تری باكوور ئه‌وروپا به‌ڕووی په‌نابه‌رانی ئه‌م وڵاته‌دا ده‌كرێته‌وه‌و كۆچی به‌لێشاوه‌كه‌ی ساڵی 2016 ی په‌نابه‌ران دووباره‌ ئه‌بێته‌وه‌...

دوای به‌دواداچوونی وردو هێمنانه‌ ئه‌وه‌مان بۆ ئاشكرابوو، به‌مه‌به‌ست و بۆ ده‌ستكه‌وتنی سوودی چه‌ند كه‌س و لایه‌ن و ده‌زگاكانی راگه‌یاندن و بازرگانه‌كان، له‌ناوخۆو ده‌ره‌وه‌ی یۆنان ئه‌و پرسه‌ هاتۆته‌ ئاراوه‌و له‌یاریكردن به‌مه‌سه‌له‌ی په‌نابه‌ران زیاتر هیچی ترنییه‌... به‌تایبه‌تیش كه‌ئێستاكه‌ له‌نێوخۆی یۆناندا چه‌ند هێزێك بۆ گه‌رمكردنی پڕوپاگه‌نده‌ی هه‌ڵبژاردنه‌كانی ناوخۆ وه‌ك چه‌كێك له‌دژی ده‌سه‌ڵات به‌كاریده‌هێنن.

  كوردستانیانی خۆشه‌ویست و په‌نابه‌ران له‌م وڵاته‌ ئاگادارده‌كه‌ین، پشوودرێژو ئارامبن و نه‌هێڵن له‌لایه‌ن ئه‌و كه‌س و لایه‌ن و ده‌زگا میدیاییانه‌ی ناوخۆو ده‌ره‌وه‌و بازرگانان به‌چاره‌نووسی مرۆڤه‌وه‌و بۆمه‌به‌ستی تایبه‌تی خۆیان به‌كاربهێنرێن، لێگه‌ڕێن پرسی مانه‌وه‌و خزمه‌تكردنیان له‌م وڵاته‌ "سه‌رباری سستی و كه‌می خزمه‌تكردن"رێكاریی  یاسایی و راست و دروستی خۆی وه‌ربگرێت و چیتر چاره‌نووسی خۆیان منداڵه‌ ئازیزه‌كانیان نه‌خه‌نه‌ دووڕیان و تونێڵێكی تاریكه‌وه‌ كه‌ سه‌ره‌نجام ته‌نیا خۆیان زه‌ره‌رمه‌ندی یه‌كه‌م ده‌بن، هاوكات لێپرسراوی كۆمیته‌ی رێكخستنی ی.ن.ك له‌یۆنان، ماوه‌ی چه‌ندرۆژێكه‌ له‌په‌یوه‌ندی به‌رده‌وامدا بووه‌ له‌گه‌ڵ وه‌زاره‌ت و لایه‌نه‌ به‌رپرسه‌كانی په‌یوه‌ست به‌پرسی په‌نابه‌ران بۆ ئه‌وه‌ی خزمه‌تگوزاریی زیاتر پێشكه‌شبكه‌ن و كاربكه‌ن بۆ باشكردنی گوزه‌رانیان، هه‌روه‌ها په‌له‌بكه‌ن له‌رێكاره‌ یاساییه‌كان بۆبه‌خشینی مافی په‌نابه‌رێتی بۆ په‌نابه‌ران به‌گشتیی و بۆ كوردستانیانی ئازیزمان به‌تایبه‌تی، له‌به‌رامبه‌ردا ئه‌وانیش لای خۆیانه‌وه‌ به‌ڵێنیانداوه‌ له‌داهاتوویه‌كی نزیكدا چاوبه‌وپرسه‌دا بخشێننه‌وه‌و هه‌ركارێكی یاسایی له‌خزمه‌تی په‌نابه‌راندابێت، بۆیان بكه‌ن.

هیوادارین هه‌موو په‌نابه‌ران و كوردستانیانی ئازیز له‌ یۆنان و وڵاتانی تری ئه‌وروپادا، به‌ویست و خواسته‌كانی خۆیان شادبن و به‌ روونتر له‌داهاتووی خۆیان بڕوانن و هه‌میشه‌ شادو سه‌ربه‌رزو سه‌ركه‌وتووبن.

له‌گه‌ڵ رێزدا
كۆمیته‌ی رێكخستنی
یه‌كێتیی نیشتمانیی كوردستان
له‌یۆنان

PUKmedia كۆمیته‌ی یۆنان