عیراق پارچە شوێنەوارێكی مێژووی بۆ دەگەڕێتەوە

.

دەسەڵاتدارانی بەریتانیا پارچە شوێنەوارێكی بابلیان بۆ عیراق گەڕاندەوە كە تەمەنی سێ هەزار ساڵە  كە لە پەرستگایەكی مێژوویی دزرابوو.

ئەمڕۆ 19ی ئاداری 2019، دەزگاكانی راگەیاندنی بەریتانیا بڵاویانكردەوە، كە حكومەتی وڵاتەكەیان پارچە شوێنەوارێكی بابلیان تەسلیمی عیراق كردوەتەوە كە لە ساڵی 2012دا لە فڕۆكەخانەی هایسرۆ دەستی بەسەردا گیرابوو، كە دوای پەیوەندی لەگەڵ مۆزەخانەی بەریتانیا دەركەوت كە بە بەڵگەنامەی ساختەوە شوێنەوارەكە گەیەنراوەتە فڕۆكەخانەی ناوبراو.

ئەمڕۆ هارتیفیگ فیشر بەڕێوەبەری مۆزەخانەی بەریتانیا دوای دڵنیابوون لە تەمەنی، پارچە شوێنەوارەكەی تەسلیمی ساڵح حسێن باڵیۆزی عیراق لە بەریتانیا كرد.

پارچە شوێنەوارەكە ناوی (كودورو)ە كە لەسەری پەیماننامەیەكی كرینی زەوی هەیە ، كە لەسەردەمی بایلیەكان كە لە بەردێكی زۆر پتەو دروستكراوە، شوێنەوارناسانیش پێیانوایە، ئەو پارە شوێنەوارە دەگەڕێتەوە بۆ سەردەمی فەرمانڕەوایی نبوخز نەسری یەكەم كە لە ساڵی 1103ی پێش زاین فەرمانڕەوایەتی بابلی كردووە.

PUKmedia  و/ گۆران قادر