خانه‌قین..كه‌مته‌رخه‌می هێزه‌ عیراقیه‌كان داعشی به‌هێزكردوه‌

.

له‌ماوه‌ی یه‌ك مانگی رابردوودا داعش زیاتر له‌ هه‌شت په‌لاماری تیرۆرستی بۆ شاری خانه‌قین و ناوچه‌كانی ده‌وروبه‌ری ئه‌نجامداوه‌و زیاتر له‌ دوو پۆلیس كوژراون و ژماره‌یه‌كی تریش برینداربوون.

به‌پێی زانیاریه‌كانی PUKmedia، كه‌له‌سه‌رچاوه‌یه‌كی هه‌واڵگریه‌وه‌ ده‌ست كه‌وتووه‌، به‌شی زۆری ئه‌و تیرۆرستانه‌ له‌گونده‌كانی باكوری جه‌له‌ولاو عه‌ره‌ب نشینه‌ سونه‌كانه‌وه‌ به‌ره‌و دوروبه‌ری خانه‌قین هاتوون و له‌نزیك باوه‌ مه‌حمودو چه‌ند ناوچه‌یه‌كی تر كێشه‌ی ئه‌منیان دروست كردوه‌.

ئه‌و سه‌رچاوه‌یه‌ باسی له‌وه‌شكرد: ژماره‌یان زیاتر له‌ 50 تیرۆرست ده‌بێت و زانیاری ورد له‌لای هێزه‌ ئه‌منیه‌كانه‌ كه‌ كێ رابه‌رایه‌تی ئه‌و گروپانه‌ ده‌كات و له‌چه‌ند شوێنێكیشدا به‌به‌رچاوی هێزه‌ ئه‌منیه‌ عیراقیه‌كانه‌وه‌ هاتوونه‌ته‌ گونده‌كان و خه‌ڵكیان كوشتووه‌و رفاندوه‌.

ئه‌و سه‌رچاوه‌ هه‌واڵگریه‌ جه‌ختیكرده‌وه‌: داعش له‌ناوچه‌كه‌دا به‌سه‌ر چوار گروپدا دابه‌ش بوون و زنجیره‌یه‌كی فراوانی شوێنی په‌لاماری تیرۆرستیان دروست كردوه‌، كه‌له‌ ناوچه‌ی نه‌دا له‌ نزیك مه‌نده‌لیه‌وه‌ ده‌ست پێده‌كات تاكو سنوری باوه‌ مه‌حمودو له‌زنجیره‌ چیاكانی حه‌مرینه‌وه‌ سه‌رپه‌رشتی ده‌كرێن.

له‌لایه‌كی تریشه‌وه‌ گونده‌كانی ناوچه‌ی ئیسڵاح به‌ته‌واوی ترسیان لێ نیشتووه‌و گروپ گروپی چه‌كداریان بۆ پاسه‌وانی خۆیان پێكهێناوه‌.

ئه‌حمه‌د جبوری، یه‌كێك له‌دانیشتوانی ئه‌و گوندانه‌ بۆ PUKmedia   رایگه‌یاند: له‌ماوه‌ی ساڵی 2018دا زیاتر له‌ هه‌شت كه‌س له‌گونده‌كه‌مان له‌لایه‌ن داعشه‌وه‌ رفێندراون و كوژراون.

رونیشكرده‌وه‌: جگه‌ له‌وه‌ش مه‌ڕوماڵاتیان دزیوین و هاوكات خانووه‌كانیان رووخاندوه‌و ناوبه‌ناویش بۆردومانیان كردوین، بۆیه‌ به‌ڕێكه‌وتن له‌گه‌ڵ هێزه‌ عیراقیه‌كان گروپی چه‌كداریمان بۆ پاسه‌وانی پێكهێناوه‌.

PUKmedia  سامان یاروه‌یس