کوردایەتی واتا حزبایەتی

ستران عەبدوڵڵا

بەشی دەیەم

دیسان دیار نییە هەر حزبێک کە سیاسەتەکانی خۆی بە راست دەزانێ و بە ئەزموون و تاقیکردنەوەی چەند جارە و چەند بارە راستی و دروستی تاقیکردۆتەوە لە شێنەیی و لە تەنگانەدا، پێویستی بەوەیە ئەندامەکانی لەهەر ئاستێکدابن داکۆکی لێبکەن و  رەوایی و رەوانی بۆ خەڵکی روون بکەنەوە و رمێنی بۆ پەیدا بکەن. کادری تەواو کادر و هەڤاڵی لێوەشاوە و دڵسۆزی حزب، ئەرکی سەرشانێتی داکۆکی لەم سیاسەتە گشتییانە بکات کە بەڕێوشوێنی راست و دروستی گەڵاڵەکراوی حزبی تێپەڕیوە و بڕیاری لەسەر دراوە. ئەرکی هەڤاڵ و ئەندامی بەتەنگەوەهاتوو ئەوەیە، لەسەنگەرەکانی گشتی، لە سەکۆ جەماوەری و دەستەبژێرییەکان، لە مزگەوت و شوێنە رەسمی و کەمپینە جیاجیاکاندا داکۆکی لێ بکات و روونی بکاتەوە، کە بۆچی ئەم بڕیار و ئەم رێگەیە راستە و بۆچی روانگەکانی تر، هی حزبەکانی تر  هەڵەن، یان شاش چوون و ئەوەی حزبەکەی ئەم راست و دروستە؟

کادری حزبی حەریف ئەرکی سەرشانی ئەوەیە، لە هەموو شوێنێکی کاریگەر و لە هەموو مینبەرەکاندا سیاسەتی حزبەکەی نیشان بدات و وەک باشترین چارەسەرەکان دەریبخات و پارێزەری بێت. خۆی لە ئەسڵدا حزبایەتی دروست وایە، کە لەبەر نیشتمان و نەتەوە و بەرژەوەندیی گشتی وڵات، داکۆکی لە سیاسەتە راست و دروستەکانی حزب بکرێت و پێداگری لەسەر بکرێت. داکۆکی لەسەر سیاسەتی راست و دروست هەرگیز دزێو و خراپ نییە و بەڵگەی پەرت بوون و ناکۆکی و براکوژیی نییە، بەڵکو بەڵگەی گەرموگوڕی دیموکراسی و راست و رەوایی ئاراستە سیاسییەکانە، کە دەبێ داکۆکی لێ بکرێت و بەسەر بەرزی و لێ بڕاوەییەوە بناسێنرێ و برەوی پێبدرێت.

حزبی سیاسی روانگەی راست و دروستی خۆی، کە پێش خەڵک خۆی باوەڕی پێیەتی، دەخاتە روو و ئینجا بە سێ ئاراستە کاری لەسەر دەکات:

1- شۆڕی دەکاتەوە بۆ خوارەوە و ئۆرگانەکانی خۆی پێدەناسێنێ و میتینگ و مینبەری شەرح و شرۆڤەی بۆ دابین دەکات و دەیکاتە سیاسەتی گشتی قایلپێکراوی حزب.

2- مینبەرە گشتییەکانی کۆمەڵ و وڵاتی بۆ دەخاتە کار، هەڤال و کادرەکانی خۆی بۆ تەیار دەکات، کە بە زانیاری و زانست و مەنتیقی دروست و پێک سەلماندن لەو مینبەرانەوە شەرحی بکات و بیناسێنێ و بیکاتە رای گشتی کۆمەڵ، مادام دروست و مادام رەوا و جوان و شایانە.

3 - لەگەڵ حزبەکانی رکابەر و جیاواز لە خۆی و دەستەبژێری را جیاواز، بکەوێتە گفتوگۆی پشوو درێژ و بە پێک سەلماندن و دیتنەوەی خاڵی هاوبەش لە گەڵیان بدوێ و لەچوارچێوەی مافی دیموکراتی و ئامرازی دیموکراتی و ئازادیدا پێداگر بێت لەسەر روانگە دروستەکانی و وابکات ئەوانی تریش قەناعەت بکەن، کە ئەم سیاسەتە راست و دروست و پێویستە و خوا و خەڵک و خاکی نیشتمان ئەوانیش پشتگیری بکەن و بیسەلمێنن و ئەوی کەموکوڕییە لەگەڵی چارەسەری بکەن و بیکەنە سیاسەتی گشتی وڵات.

خۆ دیاریشە حزبی پەرۆش و کارا و خاوەن پرەنسیب حزبی دینامیکی و نەرم و نیان و سەلمێنەرە، نەک ئینکار و کەللە رەق، بەڵام لەهەمان کاتیشدا حزبی پتەو و پێداگر و خاوەن ئەزموونە، کە دەتوانێ بە مێژوو و بە بەڵگە و تاقیکردنەوە بیسەلمێنێت ئەمە باشترە بۆ وڵات و گرنگە ئەمە سەر بگرێت.

بێگومان حزبێک کەوا نەبێ و پتەو نەبێ و خودلاواز بێ هەر لە رێوە سیاسەتی راست و دروست نییە و سەرکردایەتی و سەرکردەکانیشی لاواز و ناڕاستن و ورە و وزەی سەلماندنی سیاسەتە دروستەکانیان نییە، حزبی کەمەندکێش حزبی ئەزموون و وەفادار بە روانگە و پرینسیبەکانی.
رێژەی هەیە

PUKMEDIA