د.ئەبوبەكر خۆشناو، سیاسەتمەدار و ڕووناکبیر

PUKMEDIA

خەلیل عەبدوڵڵا

د. ئەبوبەكر خۆشناو كەسایەتییەكی سیاسی‌و روناكبیری دیاری كوردستانە‌و وەك پێشمەرگە‌و روناكبیرێك خزمەتی بەگەلی كوردستان كردووە‌و شوێن پەنجەی بەبوارەكانی روناكبیری‌و رۆژنامەگەرییەوە دیارە.

ساڵی 1956 لەگوندی خۆرانی بناری چیای سەفین لەدایك بووە.

لەهەولێر‌و بەغدا خوێندوویەتی‌و خوێندكاری بەشی وەرگێڕانی كۆلیجی ئادابی زانكۆی موستەنسریە بووە، بەهۆی ئاشكرابوونی لەكاری سیاسی نەیتوانیوە درێژە بەخوێندن بدات‌و زانكۆی بەجێهێشتووە‌و لەمانگی ئایاری 1980پەیوەندی بەهێزی پێشمەرگەی كوردستانەوە كردووە.

بەهۆی ئەوەی خولیای نوسین‌و بایەخدان بوو بەكایەی رۆشنبیری، لەشاخیش بایەخی بەو بوارە داوە‌و یەكێك بووە لە دامەزرێنەرانی یەكێتی نوسەرانی كوردستان‌و لەبواری رۆشنبیری‌و راگەیاندن‌و رۆژنامەنووسی خزمەتێكی زۆری لەشاخ پێشكەش كرد.

سەرباری ئەوەی خۆشناو وەك ئەندامی سەركردایەتی یەكێتیی نیشتمانیی كوردستان لەبواری سیاسی خزمەتی كرد‌و چەندین پۆست‌و لێپرسراوێتی حزبی وەرگرتووە.
بەڵام لەكایەی روناكبیریش هەر بەردەوام بووە‌و بەرهەمەكانی بڵاو كردۆتەوە.

ماوەی 8 ساڵ بەرپرسی بەشی روناكبیری مەكتەبی رێكخستن‌و سەرنوسەری گۆڤاری رێبازی نوێ‌ بووە‌و سەرپەرشتی دەركردنی 45 ژمارەی ئەوگۆڤارەی كردووە.
لەبواری وەرگێڕانیشدا دەستێكی باڵای هەبووە‌و چەندین كتێبی ناوازەی بۆ زمانی كوردی وەرگێڕاوە.

خاوەنی سەدان وتارو 38 كتێب‌و نامیلكەی چاپكراوە لەبوارەكانی ئەدەب‌و سیاسەت‌و وەرگێڕاندا.

ساڵی2001 بڕوانامەی ماستەی لەئەدەبی كوردی بەدەستهێنا‌و تێزی ماستەرەكەی بەناونیشانی( شیعری بەرەنگاری كوردی 1975-1991)بووە.

ساڵی 2006 نامەی دكتۆرای بەناونیشانی(جیاوازی‌و نوێگەری لەنێوان گۆران‌ونيمایوشیج) لەئەدەبی كوردی وەرگرتووە.
ئەم سیاسەتمەدارو روناكبیرەی كوردستان لە رۆژی 25ی تەممووزی 2011 بەنەخۆشی كۆچی دوایی كرد.
بەڵام ناوو ناوبانگ‌و بەرهەمەكانی بەنەمری دەمێننەوە.

دروود بۆ رۆحی پاكی د.ئەبوبەكر خۆشناوی نەمر لە ساڵڕۆژی دوا ماڵئاواییدا.

PUKMEDIA