سەرۆککۆمار: جەخت لە ژینگەیەکی ئارام بۆ رۆژنامەنوسان دەکەینەوە

راگەیاندنی سەرۆککۆمار

نزار ئامێدی سەرۆک کۆمار

سەرۆککۆماری عیراق لە راگەیەندراوێکدا بەبۆنەی یادی 157 ساڵەی دامەزراندنی رۆژنامەگەری عیراقی بروسکەیەکی پیرۆزبایی ئاڕاستەی رۆژنامەنوسانی عیراق دەکات و دەشڵێت: بەوپەڕی شانازییەوە یادی شەهیدانی رۆژنامەگەری عیراقی دەکەینەوە.

دەقی راگەیەندراوەکە...

بەبۆنەی یادی 157ساڵەی دامەزراندنی ڕۆژنامەگەریی عێراقی، گەرمترین پیرۆزبایی ئاراستەی خێزانی ڕۆژنامەوانی و ڕاگەیاندن لە عێراق دەکەم، و دەستخۆشی لە ڕۆڵە نیشتمانی و پیشەییەکەیان دەکەم لە گواستنەوەی ڕاستییەکان و گەیاندنی دەنگی هاووڵاتیان و بەشداریکردنیان لە چەسپاندنی هۆشیاریی گشتی و پشتگیریکردنی کاروانی دیموکراسی.

 دووپاتی پاڵپشتیی خۆمان دەکەینەوە بۆ دابینکردنی ژینگەیەکی ئارام بۆ کارکردنی ڕۆژنامەنووسان، و توانادارکردنیان بۆ ئەنجامدانی ئەرکە پیشەییەکانیان بە ئازادی و بەرپرسیارێتی، وەک کۆڵەکەیەکی سەرەکی لە چەسپاندنی دیموکراسیدا.

لەم بۆنەیەدا، بەوپەڕی شانازییەوە یادی شەهیدانی ڕۆژنامەگەریی عێراقی دەکەینەوە کە گیانی خۆیان بەخت کرد لە پێناو بەرگریکردن لە ڕاستی و وشەی ئازاد، تا قوربانییەکانیان لە یادەوەریی نیشتماندا بە نەمری بمێنێتەوە و ببێتە سەرچاوەی ئیلهام بۆ نەوەکانی داهاتوو.

ئێمە پشتبەستوو دەبین بە ڕاگەیاندنی پیشەیی بۆ بەردەوامبوون لە گێڕانی ڕۆڵی خۆی لە چەسپاندنی متمانە لەنێوان کۆمەڵگە و دامەزراوەکانیدا و ڕووبەڕووبوونەوەی وتاری ڕق و کینە و چەواشەکاری، و بەشداریکردن لە بنیاتنانی داهاتوویەک کە شایستەی هەموو
عێراقییەکان بێت.

نزار ئامێدی 
سەرۆک کۆمار

PUKMEDIA